Punda— Deklarashonnan ku e yu di Kòrsou, Michel “Bull” Kinburn durante e trayekto di investigashon, tantu den rapòrt di Ivy Corporate, kual deklarashon tambe lo bini dilanti durante su interogashon na Wes Komisario, ta mustra ku for di ougùstùs 2018 e rusonan tabata den tapara. Den e kaso Lacerta, Kinburn ta detené aktualmente pa averiguá so ròl durante e trayekto pa yega na un sosio stratégiko pa Refineria di Kòrsou.

Kinburn a deklará tantu den e rapòrt di Ivy Corporate komo na wes komisario. Kinburn ta konfirmá, na 3 okashon, ku e idea pa trese sosionan ruso via di PDVSA a bini for di representantenan di Count Energy, miéntras nan di RdK, no tabata di akuerdo ku esaki. Segun Kinburn, el a tende di e idea aki pa promé biaha riba un djadumingu, 26 di ougùstùs 2018. Despues ku Refineria di Kòrsou i Roderick van Kwartel , a laga Count kai den nan negoshashon, kual negoshashon a tuma lugá pafó di e trayekto ofishal, un representante di Count a manda yama Kinburn pa un kombersashon personal. Segun e representantenan di Count, e venezolanonan di PDVSA tabata harmando un truko. Kinburn a puntra e representante ta dikon e no ke papia e problema aki ku van Kwartel. Count no tabata kier a hasi esaki, aló ménos no esun ku kende Kinburn a papia kuné. Riba 26 di ougùstùs, ku tabata un djadumingu, Kinburn a drenta su outo i kore bai ofisina di Count. Na yegada, e representante a bis’é pa nan bai sinta den un kamber diferente, pasobra tabatin ofisina kual e no tabata konfia. E situashon tabata asina deskonfiá, ku e representante di Count a lòk e porta den nan propio ofisina!.  Einan unu dje representantenan di Count a splik’é ku PDVSA ta negoshando ku e rusonan pa trese krudo Kòrsou. Segun Count, Embahador Ulandes na Venezuela a manda un karta pa Promé Minister Rhuggenaath, pa evitá ku e rusonan drenta ku krudo Kòrsou, via un kortina venezolano.

Kinburn a sigui deklará ku na e momentunan ei, Count, of aló ménos representantenan di Count ya tabatin un otro konekshon rusiano, kual segun nan si tabata konfiabel i no esun ku e embahador a referí Rhuggenaath riba dje. E representante di Count, sintá den ofisina di Count na Kòrsou

Kiko: hopi ta pensa kiko por ta pasando den mente di Roderick van Kwartel. Riba e foto, van Kwartel bahando trapi di korte despues di un tratamentu sivil ku eks kolega Gilbert Cijntje a entamá kontra di Refineria di Kòrsou.

a konfirmá na Kinburn: “mi konosé rusonan konfiabel dispuesto na bai guera ku PDVSA”.  Seguidamente, e representante di Count a invitá Kinburn pa drenta e dil huntu kuné. Kinburn a ninga bisando : ”kiko bo ke logra riba e isla aki?. Bo ta “bezig” ku merikanonan i rusonan pareu, kiko bo ke fuera? E merikanonan sa ku bo ta negoshando ku e rusonan tambe? Segun Kinburn, e no a risibí niun reakshon i saliendo el a konsehá e representante di Count pa e kuida su kurpa pasobra e ta hinkando su kurpa den peliger.

 

Kinburn no a konfia e relashon entre Count i nan idea pa trese krudo via rusiano

Sea e kompania internashonal Count Energy ke desmentí òf aseptá, dos di su funshonarionan na 2018, no tabata konfiabel, segun e rapòrt di Ivy Corporate, ku Refineria di Kòrsou a laga traha. I tòg, Refineria di Kòrsou no a laga entrega un keho kontra di nan na Ministerio Públiko, pero a opta pa pèrsigui e 4 yunan di Kòrsou, Kinburn, van Kwartel, Cijntje i isidora.

Despues ku Kinburn a papia ku Count riba djadumingu na nan ofisina, dos dia despues e ta bolbe bai. Segun Kinburn e biaha aki pa e por konfirmá  si e direktor finansiero di Count, TAMBE tabata na altura di e intenshon pa Count via di su otro representante laga “krudo ruso” drenta Kòrsou.  Segun Bull Kinburn: “riba djamars 28 di ougùstùs mi a bolbe bai ofisina di Count. Bull kende tabata kordinadó di proyekto na RdK, kier a wak e direktor finansiero pa puntr’é si e tambe tabata na altura di e idea pa inkorporá e rusonan. Kinburn tabata kombensí ku e hòmber ei di Count tambe tabata sa. Bull a bisa van kwartel tambe ku Count tabata negoshá tras di nan lomba ku e rusonan. Kinburn a yega ofisina di Count riba 28 di ougùstùs i bati na porta, pero no a logra haña e Direktor Finansiero di Count, ku den e dianan ei tabata di bishita na Kòrsou den kuadro di e proyekto pa yega na un sosio stratégiko. Segun Kinburn, e la tende van Kwartel splika Count ku tur negosashon a para ku nan pasobra Count tabata ke papia riba PDVSA so miéntras esei no tabata e trayekto ofishal.