E siman aki Ramsey Silie ta haña karta di retiro

500
Tur kos ta indiká ku e siman aki e ta bai haña su karta di retiro.

WILLEMSTAD,—-Ayera for di diferente kanal ‘E Mulina’, a haña informashon ku e músiko Keyboard man kompositor areglista Ramsey Silie ta bai haña su karta di retiro, for di man di direktiva di agrupashon musikal Sabor “S.O.” Original e siman aki.

Manera ku e informashon a drenta na nos mesa di redakshon, ‘E Mulina’, mes ora a drenta den kontakto ku e músiko Ramsey Silie. Esaki ta mirando ku ta su nòmber ta na bandera na e momentu nan aki, t’asina ku ‘E Mulina’, a yama Ramsey riba e sistema di App pero tambe riba liña di telefon figo, pero sin resultado deseá.

Mas despues ‘E Mulina’, a drenta den kontakto ku Win Palo, pero manera ya a bira un kustumber  ku ya pa algun ratu kaba Win Palo no ta kontesta nos yamada di ningun manera. Pero nos fuente ku ta hopi serka di agrupashon musikal Sabor “S.O.”Original a bisa ‘E Mulina’, ku e siman aki Ramsey Silie lo bai haña su karta di retiro.

‘E Mulina’, sigur tabata ker a konfirmá esaki serka Win Palo i tambe nos tabata ker a tende e parti di Ramsey Silie mes, pero esaki pa un manera òf otro no por a tuma lugá. No di nos parti pero nos no por a haña kontakto ku e dos persona nan ariba menshoná.