‘Kaya 6’ sin futbòl ayera…

252
Hungadonan sintá riba tereno i tempu transkuriendo.
WILLEMSTAD—Playoff Kaya 6 di Promé divishon FFK, mester a kontinuá ayera den Stadion Antoine Maduro na Kintjan, ora ku Scherpenheuvel i Jong Holland mester a enfrenta otro.

Sinembargo no tabatin futbòl, apesar ku si ámbos ekipo i un kuarteto tabata riba tereno di wega. Esaki unda ku tambe tabatin fanatikonan den stadion pa presensiá e enkuentro.

Tantu e promé mitar, komo e parti komplementario a transkurí, ku hungadó di e dos ekiponan sintá abou riba tereno di wega, despues ku si a hasi e sake inisial despues di e pitaso.

Tur esaki debí ku e miembronan di arbitrahe a pone trabou abou, despues ku nan a pone dirigentenan na altura for di djabièrnè, ku si nan no risibí nan pago, ku un ke otro lo sosodé. Esaki inkluso a keda publiká pa Deporte Vigilante, tantu djasabra komo ayera.

FFK un biaha mas a neglishá esaki, unda en bèrdat rèfrinan a disidí ku nan lo no aktua, debí ku nan no a risibí nan pago ayera tampoko, riba nan respektivo kuentanan bankario.

Mirando ku ora tabata bai, a kuminsá na buska solushon, unda miembronan di direktiva a trata na komuniká ku rèfrinan. Primeramente tabata e lider di kampionato Erik Fraay, pa seguidamente presidente Jean Fransisca mes hasi su intentonan.

Den esaki inkluso a bin un diskushon, unda ku presidente a splika rèfri Adelina, ku si e no flùit ayera, ku tampoko lo e mester flùit mas, ku a kondusí ku Adelina, manera e la deklará ta kla ku futbòl i inkluso lo entregá un karta ofisialmente awe.

Tabata aki ku a buska otro rekurso i a opta pa laga Randolf Winklaar, kende pa hopi sigur no ta apto i tampoko den kondishon pa por dirigí e wega aki, ku asistensia di Nadine Carolina i tambe un otro asistente ku lo mester a hasi su debut, huntu ku Amarilys Lichtenberg na mesa, dirigí ayera.

Presensia di e kuarteto aki, a pone ku ekiponan, den forma di protesta no a hunga bala, manera mas ariba indiká.

Miéntras tantu demas rèfrinan si a akudí na stadion, komo fanatiko, pa presensiá e partido, unda algun a ekspresá nan mes na Winklaar, indikando ku esaki lo a laga nan na kaya.

Rèfri di wega, huntu ku e komisionado Valetino ‘Tino’ Chance a raportá lokual ku a tuma lugá pa dirigentenan di FFK, ku lo reuní awe den kurso di dia, riba lokual ku a pasa pa asina yega na un desishon, relashoná ku e wega ku despues ku 90 minüt a pasa ayera, no a konosé nada di futbòl i dimes tampoko anotashon.

Fanatikonan por a tuma nan sèn bèk, despues di a paga pa drenta ayera.

Sigur un bèrgwensa, despues ku FFK, pa di tantísimo biaha no ta kumpli ku entre otro e rèfrinan, pa loke ta e fecha pa pago, ku a pone ku nan kana awor si a yena.