Piratanan a yega Hulanda pa WPT

167
Tim Pirata a sali ayera pa Hulanda kaminda nan lo kompetí den WPT ku ta ranka sali maña i pa djasabra nan ta hunga nan promé wega ku lo ta kontra Hapon.

Willemstad,–  Durante oranan di mainta e ekipo Santa Maria Pirates ku algun refuerso a biaha pa Hulanda, kaminda nan a bin yega den kareda di 7’or anochi. E torneo mes ta tuma lugá di 12 pa 21 na Hulanda den e stadion Neptunes Familiestadion.

Informashon ku Vigilante a risibí ta mustra ku tur hende a yega bon i ku e selekshon lo tuma e dia di awe pa sosegá i lo hiba un praktiká leve djabièrnè pa asina nan kuminsá ku nan promé kompromiso djasabra mèrdia 1’or kontra e ekipo di Hapon i djadumingu mèrdia 13.30 kontra e ekipo di Hulanda ku ta konta pa gran parti ku yunan di Kòrsou.

PICHER HABRIDO

Tambe nos por a komprondé ku ya a disidí kaba ku e picher surdo kende ta hunga na Hulanda pa A&D Amsterdam, Jhan Rifaela lo ta e picher ku a keda asigná pa habri e promé wega ku lo ta kontra di Hapon.

Mènedjer Ramiro Balentina ta optimista i tin konfiansa ku su ekipo lo duna un bon beisbòl durante e siman di WPT. E ta bisa ku e tin un staf di picheo hopi amplio i ku bon kalidat pues kual mester ta garantia pa duna bon bataya.