Tremendo re debut di agrupashon musikal FENTY na Boneiru

84
Nan duru djabièrnè tras di lomba na Boneiru.

WILLEMSTAD,—-Djabièrnè anochi último e agrupashon musikal FENTY a hasi nan re debut den un forma maestral aya na hermana isla Boneiru. Tabata durante nan tradishon nobo “Lit Friday’s Ladies Night” den e klup nukturno Billard Blue Sports Bar kaminda FENTY realmente a pone un tremendo show. Por bisa di bèrdat ku FENTY a plama e lugá.

E públiko presente a gosa i sostené e banda kompletamente. FENTY riba e dia aki tambe a estrená nan front nobo ku ta konsistí di Jurnick (JC) Clarenda, Gerald Alberto i Zahid Frans. Tambe tin algun músiko nobo manera e drùmer Jurven Clara i e keyboardman  Robert Felida.

Hopi ta esnan presente ku a graba e aktuashon i a plama esakinan formalmente riba medionan sosial. E banda en kuestion ta bou di maneho di Shermantha Frans, kual a prueba ku nos hende muhé nan tambe ta kapasitá pa e trabou.

E konsepto “Lit Friday’s Ladies Night” sigur tin tur potensial pa bira e tradishon di Boneiru. Di e manera aki e pueblo di  Boneiru tin aun mas aktividat riba djabièrnè. FENTY ta un agrupashon ku sigur mester bai tene kuenta kuné den Reino Hulandes.