800 florin pa shofùr ku a pasa den lus kòrá i kousa aksidente

145
WILLEMSTAD,— Wes mr. Edelenbos a duna un shofùr 800 florin di but despues ku el a kousa un aksidente, nèt despues ku e la kaba di pasa den lus kòrá.

E shofùr J. de A. a presentá ku su abogado pa sali na su defensa den e kaso, unda el a kousa e aksidente lagando e víktima ku basta daño material. Tambe por a nota ku e víktima di e aksidente ainda no por kana su so i mester hasi uzo di un krùk. Tabata 1 di aprel tras di lomba na e lus di tráfiko di Winstonchurchilweg, ku e shofùr lo a pasa den lus kòrá.

El a presentá i atmití ku e la pasa den lus kòrá miéntras tambe el a bisa ku e no a mira mes ku e lus tabata kòrá na momentu ku e tabata manehá su outo. El a bisa ku e tabata pará den e lus pero e la kere e lus a bira bèrdè, unda el a aksidentá den e víktima. Segun e shofùr ku tabata na momentu ku e la kaba di buska su yu for di skol i ku e tabatin un tiki purá.

Segun e shofùr ku e no sa ta kiko a bai robes i ku ta promé biaha den su bida ku el a hañ’é den un kos asina aki. Fiskal a bisa ku e shofùr ta kulpabel di e echo, miéntras tambe el a bisa ku e shofùr lo no haña kastigu di prizòn pero lo e mester paga un but pa e infrakshonnan ku e la kometé den tráfiko.

El a pidi 300 florin di but pa e shofùr pa kore pasa den lus kòrá miéntras pa kore iresponsabel e la pidi 500 florin di but. Segun e fiskal ku esaki ta pa e shofùrnan paga tinu aki na Kòrsou i no pone bida di otro na peliger. El a keda defendé pa su abogado mr. Dickens, unda wes mr. Edelenbos ta esun ku a dikta e sentensia.

E wes a splika ku e ta haña e fiskal tin rason, esta ku e shofùrnan aki na Kòrsou mester pone mas tinu ora nan ta manehá nan outo. Tambe el a bisa ku e ta haña e demanda di fiskal ta rasonabel unda el a honra esaki. Tambe el a buta e shofùr na altura ku e por apelá e desishon si e no ta di akuerdo ku esaki.

E shofùr a bisa di lo distansiá su mes for di e desishon i lo bai paga e but. Tambe e shofùr lo a pidi e víktima basta sòri, unda el a splik’é ku e no a kousa e aksidente intenshonalmente.