CITI A start ku registrashon di empresarionan pa partisipá na Curacao Innovation Award 2019

67
Willemstad – CITI a habri registrashon ofisial pa empresarionan por partisipá na e 21 edishon di Curacao Innovation Award. Registrashon ta habrí te ku 30 di Yüli i por inskribí riba e wèpsait www.innovationaward.cw

Curacao Innovation Award ta un evento anual pa invitá komersiantenan inovativo pa partisipá i alabes motivá komersio en general pa pensa i aktua inovativo den nan empresa. E evento a kuminsá komo inisiativa di ántes Innovatie Centrum Curacao (ICC) for di 1996. ICC a sigui ku su ehekushon te ku awor ku e kompania ta karga e nomber di CITI.

Ministerio di Desaroyo Ekonómiko a djòin e proyekto despues ku sosten finansiero. E aña aki tambe e ministerio ta partner esensial den e proyekto.  Un kantidat grandi di empresario a partisipá i gana e premio aki durante su trayektoria. E promé ganadó di, ántes yama `Innovatieprijs`, tabata fábrika di limonada Criollita.  Despues a sigui diferente ganadó manera: Sentro Orto-físiko Kòrsou, Maduro & Curiels Bank, CurAloe, Fundashon pa Planifikashon di Idioma (FPI), Better Deals, The CoffeeFactory, Skempi, IBIS Management, TV Direct, Stampwallet, Cariflix. I e premio 2018 a bai pa Skenicash.  Partisipantenan por kompetí den 5 kategoria. Pa kada kategoria CITI a aserka un organisashon, ku a base di nan ekspertisio, por analisá partisipantenan i skohe un ganadó.

E kategorianan i e organisashonnan ta respektivamente:

  • Business Innovation Award den kolaborashon ku D&I.
  • Social Innovation Award konhuntamente ku Curacao Cares.
  • Sustainable Innovation Award lo ta na enkargo di Bedrijvenplatform Milieu (BPM),
  • Junior Innovation Award den kolaborashon ku CAAG Software miéntras ku e premio máksimo
  • Curacao Innovation Award, lo ta na enkargo di Ministerio di Desaroyo Ekonómiko.

E kategoria ku ta gosa di un gran popularidat ta People`s choice award ku ta e premio otorgá na organisashon ku mas voto riba medionan sosial. Pues keda pendiente pa e videonan asina gusta di partisipantenan ku ta subi página di Facebook di CITi algun dia promé ku e evento i vota pa bo inovashon preferí. E premio aki ta masha gusta bou di empresarionan pa e atenshon ku e kompania i inovashon ta haña for ora ta den kontienda. Mayoria di e ganadónan a krese enormemente despues di partisipá i gana e premio aki. CITI ta invitá, tur persona òf empresa ku proyektonan inovativo, pa partisipá na Curacao Innovation Award 2019. Tambe tin posibilidat ku e tim di CITI por asistíbu na ora di yena e formulario di registrashon. Pa mas informashon tuma kontakto ku CITI na analies.hooi@citi.cw òf 7386299. Like e facebook Curacao Innovation & Technology Institute i keda na altura di tur desaroyo di e prestigioso premio aki.