Kaso tripel intento asesinato lo konosé sentensia

465
Kaso ku a hala basta atenshon.
WILLEMSTAD,— Mañan wes lo dikta sentensia den kaso di e hòmber Efraim Constancia despues ku e la trata na kita bida di 3 persona, nèt despues di un diskushon ku tabatin na e mesa di dominó.

Tur esaki despues ku 4 novèmber aña pasá mester tabatin wega di dominó den aria di Boka Samí, unda e sospechoso lo tabata pará na e mesa ta wak. Na momentu ku e wega a kaba e víktima di fam M. lo mester a kaba di gana e wega huntu ku su pareha di e partido, unda esnan pèrdèdó a lanta pa otro duo sinta i hunga dominó.

Na e momentu aki e sospechoso lo kier a sinta na mes pa hunga promé ku e duo ku a surgi un diskushon entre e víktima di fam M. i e sospechoso unda mester insultamentu di mama di otro na e sitio. Segun testigunan ku tabata tei na e sitio ku e sospechoso i e víktima di fam M. lo kier a bringa unda mester a tene nan pa esaki no pasa.

Tambe  algun testigu lo a deklará ku e víktima di fam M. lo a yama e sospechoso homoseksual di un forma insolente. Segun un testigu ku tabata na e sitio ku ta ora e víktima M. lo a yama e sospechoso Constancia e palabra insolente, e la bira loko unda e situashon a hera di sali for di man. Segun e testigu ku e sospechoso lo a bira loko unda el a kana bai direkshon di su outo riba e dia en kuestion, unda lo el a keda sintá pa algun ratu den su vehíkulo.

E sospechoso ku no a gusta kon a insult’é lo a hala su outo mas serka di e mesa di dominó unda el a baha for di e vehíkulo. Constancia a yega serka di e mesa di dominó na Último Snack, unda el a dirigí algun palabra na e víktima M. Costancia a aserká e  víktima di fam M. unda el a bisa e víktima ku e no a gusta e sistema kon e kos a bai, esta ku a kaba di insult’é dilanti hopi hende. E testigu a deklará ku tabata ora ku M. a lanta for di su stul, ku e sospechoso a los tiru mesora dirigí riba dje.

E  víktima M. lo a kue e sospechoso tene, unda mesora despues a skucha un di 2 i tambe 3 tiru tiru sali for di e arma kandela di Constancia. Mesora despues M. lo a logra kita e arma kandela for di e sospechoso unda el a dirigí esaki riba dje. Ta trata aki di un kaso basta serio unda e sospechoso Constancia a intentá na kita bida di 3 persona, despues ku un di nan lo a yam’é un palabra ku e no a gusta. Ministerio Públiko a bisa den e kaso ku tin tur indikashon ku e sospechoso a tira riba 3 persona i ku e mes a atmití esaki bisando ku e no kier a hasi esaki.

Ministerio Públiko a bisa di ta haña e kaso aki basta grave, unda a bisa ku mester baha ku man duru riba dje, mirando ku apesar di e 3 víktima nan vários persona mas su bida tabata na peliger. Pa esaki a bisa ku lo tene kuenta ku su edat pero tòg lo pidi un kastigu haltu pe. A pidi 8 aña di prizòn pe,  kitando e parti ku ya e la sinta kaba den e parti di su detenshon preventivo.

Mañan mainta wes lo dikta sentensia den kaso di Constancia.