Ladron tin 21 aña ta molestiá abitantenan i empresarionan

749
Sospechoso ku tabatin basta tempu molestiá abitantenan.
WILLEMSTAD,—- E hòmber E.S. a keda kondená algun luna pasá den un kaso pa di tantísimo biaha ku el a hòrta propiedat di algun persona. Ta mas ku 20 aña kaba e hòmber aki lo mester tabata hòrta pertenensia di su víktima nan.

Den un di e último kasonan di ladronisia e hòmber aki lo a laga ‘vingerafdruk’ na e sitio, unda mirando kon konosí e ta mesora a bin sa ku e ta esun tras di e ladronisia. Na momentu ku E.S. tabatin oportunidat pa e papia durante su kaso e no a bisa mashá, unda el a preferá pa su 2 abogadonan hiba defensa, mirando ku tabatin basta prueba kontra di dje.

Loke a hala basta atenshon den e kaso ta e echo ku ta pa basta aña e hòmber aki lo tabata tormentá bida di  vários víktima. Segun wes ta trata aki di un hòmber ku pa basta aña kaba ta kai será pa kasonan similar, unda tambe a trese dilanti ku ta for di aña 1998, esta 21 aña pasá el a inisiá kai será pa kasonan di ladronisia.

Tabatin un kaso di ladronisia kontra E.S. unda e mester a kometé esaki na aña 2017, pa ta mas eksakto 4 di òktober 2017 unda el a bai ku vários pertenensia di algun víktima despues ku el a drenta e kas den forma di kiebro.

Tabata despues ku un víktima a skucha algun zonido den un negoshi ku a bai tira bista, ku a haña E.S. ku a subi dak pa e hui riba e dia en kuestion. Na momentu ku a nota ku e akusado tabata den e negoshi a bin mir’é den kushina unda el a trata na hui. Tabata aki ku a bin graba e akusado ora el a subi dak di e negoshi, unda a mustr’é e grabashon aki tambe na polis durante su interogashon.

Segun wes ku ora polisnan a mustr’é e grabashon unda klaramente por mir’é den esaki el a atmití ku el a drenta den e negoshi. Durante e tratamentu den su kontenido e hòmber E.S. a para ariba ku e no a drenta e negoshi riba e dia en kuestion, miéntras tambe el a bisa ku e no ta kòrda nada di e deklarashon di dje.

Otro kaso ta unda e mester a hòrta unda a hañ’é ku e pertinensianan. Esaki a tuma lugá 29 di yüni di aña 2017, unda e akusado tabatin kuminsá i kosnan pa dòrna kèrstbom den un kaha.

Tambe aña pasá den luna di aprel Scorea a hasi su mes kulpabel di otro kaso di intento ladronisia, unda e kier a hòrta den algun outo ku tabata na Caribbean Motors, ku tabata na e negoshi pa haña servisio. E kaso aki tambe el a ninga di ta kòrda algu di dje, unda wes a bisé ku tin tur prueba ku el a hasi su mes kulpabel di e echo aki tambe.

Den luna di desèmber aña pasá e hòmber aki a hasi su mes kulpabel di un kaso, unda despues di un ora i mei ku e víktima a regresá el a bin haña e gran sorpresa ku a drenta su kas i bai ku algun pertenensia. Den e kaso aki a haña ‘vingerafdruk’ di E.S. unda wes a bisa ku ta pa basta aña kaba e hòmber aki ta molestiá abitantenan i tambe empresarionan.

A kastig’é na 30 luna di prizòn, unda a asta bisa ku na vários okashon a trata na yud’é pero e mes no kier yuda su mes.