Ministerio Públiko a apelá sentensia La Tasca

1151
El a apelá su sentensia.
WILLEMSTAD,—- Ministerio Públiko a apelá sentensia den kaso Venus, unda a kastigá doñonan di e negoshi na kastigu di prizòn, miéntras tambe a kastigá un polis 3 kómplise mas.

Ta trata aki di e akusado Micheal i Nina Koense, Yolimar de Hurtado, Steven Seinpaal i B.V.L. ku a skucha kastigu serka wes mr. Edelenbos despues ku fiskal mr. de Groot a pidi kastigu pa nan. Esaki despues ku a trata e kaso, unda fiskal a pidi kastigunan basta haltu pa komplisidat di trafikashon di hende i tambe laga ilegal traha na e negoshi.

Pa e doñonan fiskal mr. de Groot a pidi 5 aña di prizòn, esta pa Nina i Micheal, miéntras pa e polis Steven Seinpaal el a pidi 2 aña di prizòn inkondishonal. Pa e dama de Hurtado a pidi 18 luna di kual 6 ta kondishonal ku 3 aña di prueba. Pa B.L. a pidi un kastigu di 3 aña inkondishonal. Tur esaki despues ku e dama nan a deklará den e kaso i bisa ku tabata paga nan solamente 175 florin pa siman i tabata pone nan traha duru mas ku 12 ora pa dia. E damanan a bisa ku nan tabata yega Kòrsou ku un debe, mirando ku nan mester paga tur e gastunan di biahe bèk.

Otro punto ku a bin dilanti ta e echo ku e dama nan tabata bai skonde den baño pa asina nan por drumi, mirando ku nan ta keda basta kansá despues di traha pa e akusadonan di fam Koense. Mas aleu nan a deklará ku e dama B.L. kende ta ruman di Nina lo mester tabata hasi tur kos pa e pareha, miéntras tambe tabata kontrolá nan pa wak ku nan a yega i bai na ora.

Durante e kaso a bin dilanti ku e dama nan tabata haña but entre 200 i 250 florin pa yegamentu lat òf si nan keda sin presentá na e bar La Tasca. Segun e víktima nan ku tabata buta hopi preshon riba nan, pa nan buta e kliente nan bebe mas tantu trago posibel. A bai hasi un konteo di kuantu plaka e dama nan tabata gana pa ora, a bin saka afó ku tabata paga nan solamente NAFL 2.50.

Segun Ministerio Públiko ku a hasi un konteo pa wak kuantu sèn e negoshi tabata traha, esta nan ganashi unda a bin saka un montante di 321 mil florin, miéntras tabata paga e víktima nan basta malu segun OM. E wes di promé instansia a huzga ku e grupo aki ta kulpabel di e kaso aki, unda tambe el a bisa ku tin 3 kómplise miéntras e doñonan di fam Koense ta e akusadonan prinsipal.

El a bisa ku e sistema ku tabata trata e dama nan djis pasó nan tabatin nesesidat i tabata bin Kòrsou pa buska un mihó bida i kria na famia, no ta humano. Segun e sentensia di e wes di promé instansia ku esaki ta kontra tur derechi humano. Mr. Edelenbos a kastigá e Nina i Micheal na un kastigu di 30 luna di prizòn kada un. El a bisa ku nan ta haña mas kastigu mirando ku nan ta e akusadonan prinsipal.

Seinpaal a skucha un kastigu di 12 luna di prizòn, miéntras e dama B.L. a skucha 18 luna di prizòn di kual 6 ta kondishonal ku 3 aña di prueba. Wes a kastigá de Hurtado na 9 luna di prizòn di kual 3 ta kondishonal ku 3 aña di prueba. Mesora despues di e kaso wes a pone ámbos partido na altura ku nan por apelá e sentensia den 14 dia.

Ministerio Públiko no tabata di akuerdo ku wes a baha e kastigunan den e kaso, unda mesora a bai apelá. Lo keda pendiente pa e tratamentu di e kaso den apelashon.