Mr. Out a hala atras i duna un otro fiskal kaso pasó dama a bisa ku el a menas’é

178
Fiskal ku tabata na palabra den e kaso.
WILLEMSTAD,—- Ministerio Públiko a konta ku un otro fiskal den un kaso di infrakshon den tráfiko, despues ku e fiskal ku tabatin e kaso lo mester intermediá via di mail, pa bisa e sospechoso ku si e no atendé e kosnan na nèchi lo hib’é dilanti un wes.
Ta trata aki di fiskal mr. Out ku a bai tuma kontakto ku e sospechoso unda el a splik’é ku e mester para responsabel pa su akto. Mr. Out a bai papia via di mail ku e dama unda el a bis’é ku e mester kubri gastunan di e aksidente ku e la kousa i sigui kore bai. Tabata 23 di novèmber di aña 2016 ku e dama lo a kousa un aksidente, na momentu ku su vehíkulo no tabatin seguro.

E fiskal a keda skuchá komo testigu den e kaso, unda el a bisa ku primeramente e no a pensa tokante e intermediashon. Segun e dama ku e la haña un mail ku a lag’é sintié menasá dor di e fiskal, unda ta bisé ku si e no kumpli ku e gastunan esaki por tin konsekuensia pe. Segun e mail, ku fiskal lo a bisa e dama ku si e no kumpli lo e sòru pa e haña kastigu di prizòn, paga e víktima di e aksidente daño perhuisio i tambe pa e kastigu wòrdu ehekutá te na Hulanda.

Tur esaki despues ku 27 di mart di aña 2017 e dama lo a biaha pa Hulanda, despues ku algun luna promé el a kousa e aksidente miéntras tambe lo el a primintí ku e ta bai kubri e gastu i no a kumpli ku su promesa. Tabata despues di un yamada ku e dama lo a haña di un polis ku lo e mester a bai warda, pa asina atendé e aksidente ku el a okashoná i kore bai.

E dama ku a bai na warda mesora a keda butá na altura ku e mester kumpli ku e gastunan mirando ku tin tur indikashon ku el a kousa e aksidente. E sospechoso di fam Groothuis a bisa e polisnan ku e tin un konosí ku ta drecha outo, unda huntu ku e polisnan el a kore bai e garashi pa asina wak kuantu esaki lo Sali.

Na momentu ku a yega na a garashi lo a buta e sospechoso na altura di e montante di plaka ku e mester paga, miéntras despues no a tende nada mas di dje. Tabata riba e fecha ya menshoná ku e dama lo a biaha pa eksterior. Tabata na e momentu aki, esta un dia despues ku e fiskal lo a bai aserká e dama via di mail, pa asina e por splik’é kiko por ta e konsekuensianan di e echo ku e la baha bai Hulanda sin para responsabel di su akto.

E kos no a kai den muchu bon tera serka Ministerio Públiko, unda lo a kita e kaso for di fiskal mr. Out despues ku e dama lo a bisa ku e ta sintié menasá pa e fiskal. E dama lo a asta deklará ku e tabata sintié menasá pa e persona ku el dal den dje riba e dia en kuestion. Ministerio Públiko a disidí ku nan lo kita e kaso for di fiskal mr. Out unda a duna un fiskal di Boneiru esaki. Mr. Out a keda skuchá komo testigu den e kaso, unda el a splika ku e no a pensa promé ku e bai aserká e dama via di mail.