Pa debe ku gobièrnu tabatin tin atrakadó ta kana liber

1611
Kaso ku mester a laga sospechoso bai kas pa motibu di debe atrasá.
WILLEMSTAD,—- Un punto ku sigur a hala atenshon den korte ta e echo ku mester a laga 3 sospechoso den algun kaso basta serio bai kas, mirando ku gobièrnu tabatin debe na NFI i no por a haña rapòrt di DNA pa proba ku nan ta kulpabel.

Ta trata aki di 2 diferente kaso unda no a keda wes nada otro di laga e sospechosonan bai kas, despues ku a posponé esakinan na vários okashon i no por a yega korte ku e rapòrt di NFI ku ta mustra ku e sospechosonan ta kulpabel. Den e kaso di atrako i intento asesinato Vanddis, a laga 2 hòmber bai kas mirando ku gobièrnu tabatin debe basta grandi habrí na Hulanda.

Tabata despues ku a logra likidá e debe ku gobièrnu tabatin, unda a sigui traha rapòrtnan di otro kasonan miéntras ainda tin algun posibel atrakadó ta kana liber. A disidí ku lo bai traha rapòrtnan ku tin prioridat promé, miéntras e kasonan aki ta pendiente pa bin korte. Den kaso e atrako na Vanddis a laga e sospechosonan bai kas unda te awe no a sigui ku e kaso mas.

Ku esaki kier añadí ku e echo ku gobièrnu a laga e debe akumulá na NFI ta pone ku wes no tabatin opshon di e laga e posibel sospechosonan bai kas, miéntras nan mester a keda pendiente pa presentá na korte i para responsabel di e kaso komo sospechoso ku tin libertat. No ta konosí kon leu ta ku e rapòrt di e kaso aki mirando ku ta for di aña pasá desèmber e sospechosonan a bin dilanti pa último biaha.

Dia e hòmbernan a presentá último biaha a laga nan bai kas mesora pendiente e resultado di e rapòrt. Otro kaso ta unda e hòmber A.C. lo mester a rekobrá su libertat, despues ku lo e mester a kometé un atrako basta serio. Tabata den luna di febrüari tras di lomba ku e hòmber A.C. su kaso lo mester a keda tratá den su kontenido, unda na momentu ku el a yega korte el a haña un notisia ku sigur a but’é smail.

Esaki despues ku Ministerio Públiko lo a pidi pa hasi un tèst di DNA, unda no por a presentá ku esaki na korte. No a keda wes nada otro di manda e sospechoso ku lo mester a atraká su víktima i hink’é bai kas. Loke sigur a hala a atenshon ta e echo ku lo mester a bai hasi tèst di un sanger ku lo a keda atras riba sapatu di e sospechoso.

Segun Ministerio Públiko tin indikashon ku ta trata aki di sanger di e víktima, ku lo mester tabata riba sapatu di A.C. E echo ku no tabatin rapòrt esaki a keda djis na un indikashon mirando ku no por a proba sin e rapòrt. Den luna di febrüari tabatin un stapel basta grandi di tèst ku lo mester a keda hasí na NFI, unda tambe a bin dilanti ku tabatin algun kaso ku tin prioridat riba otro.

E hòmber A.C. mester a atraká su víktima 1 di yüni aña pasá el a kita telefòn i vários pertenensia mas for di e víktima. Tabata na e okashon aki ku el propiná e víktima na vários okashon ku kuchú. E sospechoso aki a hinka e víktima na altura di su pia drechi i tambe banda di su kara.

Segun Ministerio Públiko mester a asta trata na strangulá e víktima, durante e kaso di atrako aki. E sospechoso mester a asta bati e víktima ku moketa i dal e algun skòp. A.C. a keda para ariba ku mester dun’é plaka i oro riba e dia en kuestion. E víktima di fam J. a deklará ku el a skucha e sospechoso papia ku un aksènt spañó ku na esaki el a rekonos’é.