Segun wes sospechoso tabata será 14 luna inosentemente

480
A tene T. será 14 luna sin prueba.
WILLEMSTAD,–  Wes mr. Paulides kende lo bandoná nos isla a dikta sentensia den kaso di e hòmber T. ku a keda deklará liber den un kaso di asesinato di su propio amigu aki na Kòrsou na aña 2017.

Esaki despues ku el a keda será 14 luna inosente riba un kaso, unda ta bisa ku el a mata e víktima Acosta. Ta trata aki di e kaso unda tabata sospech’é di a mata su mihó amigu, unda Ministerio Públiko no a logra konvensé wes ku e ta esun ku a tira riba e dia en kuestion.

E sospechoso tabata basta kontentu último biaha ku e tabata den sala di korte, unda a but’é na altura ku lo e mester bai kue su pertenensia nan prizòn pa e por bai su kas. Di otro banda e kaso a laga basta tristesa, mirando ku e famia nan ku a pèrdè nan ser kerí lo no por haña daño perhuisio mirando ku no a haña esun responsabel pa e asesinato.

Tur esaki despues ku Ministerio Públiko tabatin un rekisitorio basta amplio, unda nan prueba mas fuerte tabata e polvo riba man di e sospechoso i tambe deklarashon di un bewaker. Segun Ministerio Públiko ku e bewaker aki lo a para wak e suseso riba e dia en kuestion. A bin dilanti un deklarashon di e bewaker unda e ta bisa di a mira e sospechoso haña un stot, unda el a bai patras kual aki el a bin tende e promé tiru.

A bin dilanti den e kaso ku despues di e promé tiru vários tiru mas mester a alkansá e víktima, ku konsekuensia ku el a kai. Otro punto ku a bin dilanti di e kaso ta e echo ku e sospechoso mester grita bisa ku a kita arma for di dje i kita bida di su amigu. Tambe el a keda bisa e víktima pa e lanta pero ya e tabata halando su último rosea nan.

Tambe e bewaker a trese dilanti den su deklarashon na wes komisario, despues di su promé deklarashon ku e no a mira ku e víktima tabatin problema ku otro persona. Segun OM ku tata di e víktima, a bisa ku ta T. mester a kita bida di Acosta. Ministerio Públiko a trese dilanti ku algun testigu a deklará ku e víktima no tabatin problema ku niun hende segun nan den e diskotèk. E testigu nan a deklará ku e víktima tabata kontentu riba e dia en kuestion.

Segun un otro testigu den e kaso ku algun persona a bis’e ku T. ku e víktima tabatin problema ku algun hòmber den e diskotèk, miéntras tambe e testigu a bisa ku tur ‘amigu’ di e víktima a bai for di e sitio. A bin haña un total di 12 hùls na e sitio, unda a bin resultá ku esakinan a sali for di e mesun arma kandela. Tabata hùls di un arma kaliber 9mm.

Ministerio Públiko a laga traha un rapòrt di NFI unda e rapòrt lo tabata indiká ku ta T. lo a tira e víktima. Segun OM ku e por rapòrt a proba ku e sospechoso T. lo a tira e víktima di aserka. Segun e eksperto ku a traha e rapòrt aki ku 1 pa 2 tiru tabata sufisiente pa kita bida di e víktima, den e distansia ku e la keda tirá.

Ku esaki wes den e kaso a trese dilanti ku e sospechoso a keda será pa mas ku un aña, miéntras a disidí ku lo kastig’é solamente pa poseshon di arma kandela, unda a lag’é bai kas mesora. Te ku awe no a haña esun responsabel pa e kaso di asesinato aki, miéntras Ministerio Públiko no a bai den apelashon ku e sentensia ku wes a dikta.