Te ainda no a resolv’é asesinato na diskotèk Gosieweg

354
Kaso ku ainda no a konosé solushon.
WILLEMSTAD,— Ministerio Públiko ta investigando un kaso asesinato ku a tuma lugá aki na Kòrsou, na un diskotèk situá na Gosieweg i te awe no por haña esun responsabel pa esaki.

A detené un persona den e kaso aki i despues di basta luna ku no por a proba ku el a kometé e echo,a disidí di lag’é den libertat. Esaki despues un persona mester a pèrdè su bida dilanti un sentro nokturno aki na Kòrsou, unda e víktima tabata amigu di e sospechoso. Tabata e víktima Darwin Herro Acosta ku a bin pèrdè su bida, despues ku el a risibí diferente tiru. Un total di 12 hùls a bin haña na e sitio, unda e víktima tabatin un bala den su frenta.

Den e kaso aki a detené e hòmber di fam T. unda el a konta ku defensa di abogado mr. Sulvaran ku a sak’é liber den e kaso. Na vários okashon defensa di e hòmber T. a pidi pa lag’e liber riba e kaso aki, unda el a trese dilanti ku niun testigu su deklarashon no por ta sosten pa tene T. será, mirando ku esaki nan no ta konsistente.

E hòmber T. mes durante tratamentu di su kaso a hasi uzo di su derechi keda ketu, miéntras el a bisa ku su abogado mes lo splika kon tur kos a bai. Durante  e investigashon di e kaso un DJ ku lo mester tabata tei presente na e sentro nokturno lo a deklará, unda el a splika ku el a mira ku tabatin un diskushon.

Segun e DJ ku e tabata den baño di e sentro nokturno unda el a mira ku e sospechoso i e víktima lo tabatin un diskushon ku otro. Segun e DJ ku a surgi un diskushon entre nan den e baño unda e sospechoso mester a saka un arma di kandela. Segun e hòmber di fam N. ku tambe tabata tei presente ku e víktima na e okashon aki, a bin pidi sòri pa e suseso unda el a bisa ku e arma ta di dje i ku e víktima tabatin esaki na e momentu ei pero lo papia kuné pa kalma e problema.

Ta trata aki di un kaso asesinato ku a tuma lugá 2 di novèmber di aña 2017, unda e sospechoso a keda detené mesora na e sitio. Na momentu ku a yega na e sitio e víktima no tabata duna señal di bida. Loke tambe a bin dilanti durante e kaso, ta e echo ku e sospechoso mester tabata sintá serka e víktima na momentu ku e tabata drumí abou, unda ku awa na wowo e tabata bisa e víktima pa e lanta.

Otro punto ku a bin dilanti durante e kaso ku e sospechoso mester a bisa ku e víktima tabatin problema ku 3 pa 4 hòmber ku tabata na e sitio riba e dia en kuestion. Tambe a bin dilanti ku e víktima mester tin problema ku e gèng Army. Durante e kaso wes a trese dilanti ku tin un deklarashon, ku ta bisa ku e víktima mester tabata debe e gèng aki. Di otro banda tin algun testigu ta deklará ku e sospechoso tabatin relashon amoroso ku e víktima su frei, miéntras tambe a bin dilanti ku e sospechoso tabatin algun tempu kaba ku e kier mata e víktima.

Loke sigur ta halando atenshon ta ku te ku awe no a logra detené e persona responsabel pa e asesinato aki i ku e sospechoso ku tabata detené den e kaso, a keda lagá den libertat.