Instrukshon i medida di supervishon riba Kòrsou

370
Atvertí: lokual a atvertí minister Gijsbertha pa pone atenshon na kuenta koriente di gobièrnu a wòrdu neglishá i Ulanda su strategia a bin resultá den un instrukshon riba maneho di e minister.
Punda—E fastball ku kabinete Rhuggenaath tabata kier a manda Hulanda, pa desviá for di e Lei di Supervishon Finansiero di Reino, Rft, no a pasa. Konsekuentemente, Hunta di Minister di Reino, ayera a disidí pa aprobá un Instrukshon Finansiero riba Gobièrnu di Kòrsou.

Un instrukshon ta nifiká pa un periodo no definí, ekspertonan ulandes lo guia i manehá finansa públiko di Kòrsou i minister di finansa lo kai dirèkt bou di instrukshon di e ekspertonan. Na yüni 2022, lo evaluá konsekuensha di e medidanan.

Ayera sekretario di estado di Asuntunan Interno i Relashonnan den Reino, Raymond Knops a manda un karta na Ministerio di Asuntunan Interno na Den Haag unda e la konfirmá e desishon di Hunta di Minister di Reino. Segun Knops na mesun momento el a ofisialisá un areglo individual ku Kòrsou, Ulanda lo duna sosten na e maneho finansiero di e isla. E karta di Knops, ta nada mas sino un bèrgwensa diploma di inkapasidat di Kabinete  Rhuggenaath i prinsipalmente minister di finansa. Segun Knops, e petishon di Kòrsou pa konsiderá nan posishon debí na e bòikòt ku ekonomia venezolano no ta di balides pa evitá un instrukshon. Segun Raymond Knops, esaki no tin nada di haber ku e situashon deplorabel den e maneho finansiero di e isla. Pa tal motibu Kòrsou no tabata por a hasi apelashon riba art. 25 di e Lei di Supervishon Finansiero di Reino, e asina yamá;a Lei di Konsenso Finansiero. E instrukshon ta bira unu definitivo i Kabinete Rhuggenaath ta bou di kuratela.