Knops ke mira Kòrsou paga

2652
Punda—Raymond Knops, pa di dos biaha den istoria a mustra polítikonan di Kòrsou, ku mester baha kabes i komprondé ku ta Ulanda ta disidí. E  promé biaha tabata na 2018, momento el a simplemente mustra parlamentarionan durante IPKO, ku nan no tin nada di bisa i ayera un biaha mas el a firma un akuerdo individual unda, Kòrsou simplemente mester saka sèn fo’i saku i paga!

Knops a informá Ministerio di Asuntunan Interior ku entretantu e la firma un akuerdo individual ku Kòrsou, esta pafó di e struktura di Leinan di Konsenso i restrukturashon estatal. E akuerdo tin un kantidat di 15 artíkulo i lo finalisá na yüni 2022. Esaki ta nifiká Kòrsou tei paga mas tantu impuesto durante 3 aña largu. E promé artíkulo di Knops ta definí mesora: “inkomstverhogende maatregelen”, esta medida pa oumentá entrada di gobièrnu. Esaki ta nifiká dirèkt, pago di mas impuesto. Entrante 2020 ta bini kambionan fiskal den pais unda inkremental tei kobra mas tantu impuesto. Knops ta papia di “gefaseerd”.  Pa mas tardá, pa final di desèmber, Kòrsou mester tin un proposishon fiskal nobo presentá na su parlamento pa aprobá. Pero for di 2019, mester inisiá e trayekto preparatorio.  Pa lokual ta trata finansiamentu, segun e akuerdo, Kòrsou tin oportunidat di hasi un fiansa di 180 mion florin destiná pa stimulashon di proyektonan ekonómiko via di kuenta kapital supervisá pa e banko, ku aktualmente ulandesnan ta konsehando, Invest-Curacao. Mester remarka ku ya kaba minister Gijsbertha a opta pa duna Invest Curacao kasi 60 mion florin for di benta di UTS.

Ya kaba pa medio sèptèmber, Kòrsou mester entrega Ulanda un rekuento di proyektonan ekonómiko. Esaki mester sosodé tambe kada 6 luna. Den artíkulo 5, insiso 3 ta preskribí e outorisashon pa gobièrnu di Kòrsou bende su propiedatnan i kompanianan anónimo. E resultadonan neto di benta di tur kompania anónimo i propiedat di gobièrnu, mester keda aktivá riba kuentanan di Invest Curacao. Den artíkulo 7, e akuerdo ta preskribí kon tei finansiá e bankarota di Curaçao Medical Centre, HNO. Esaki lo sosodé atraves di e medidanan fiskal imponé riba e pueblo di Kòrsou.

Knops ke mira ehekushon di kòntròl riba e medidanan. Esaki lo sosode mediante di un komishon, kual ta konsistí di un miembro di Kòrsou, unu di Ulanda i un di tres miembro i alabes presidente. E presidente ta wòrdu nombrá pa Kòrsou bou di konsulta ulandes. Pa kada kuartal, e komishon mester duna reportahe di avanse.  E akuerdo ta finalisá riba 30 di yüni 2022.