Scherpenheuvel a apelá desishon di FFK

157
Scherpenheuvel.
WILLEMSTAD—Dirigentenan di e ekipo di Scherpenheuvel, a apelá e desishon di FFK, relashoná ku nan partido di djaluna último. Esaki na momentu ku nan ekipo, lo mester a enfrentá e ekipo trikolor di Jong Holland na Kintjan i no tabata di akuerdo, ku e rèfri ku a keda asigná pa dirigí e partido. Tur esaki despues ku rèfrinan tabata den wèlga, debí di no a risibí nan pago.

Riba e fecha en kuestion tantu Scherpenheuvel, komo Jong Holland su 11 hungadónan a partisipá pasivamente den e wega, despues di a hasi e promé sake riba pitaso di rèfri Randolf Winklaar i no a hasi ningun otro intento mas den e wega, unda ku inkluso nan tabata sintá abou riba tereno, miéntras ku minütnan ta transkurí.

Relashoná ku esaki FFK a hasi nan investigashon i tambe tende dirigentenan di e ekipo, unda ku a yega na e desishon ku e partido ta keda un empate sin anotashon, i ku tantu Scherpenheuvel komo Jong Holland, lo mester kumpli ku pago di un multa di 750 florin i tambe nan mester kubri e gastunan ku tabatin pa e enkuentro aki, repartí den nan dos.

Scherpenheuvel, ku tabata di akuerdo ku e desishon aki, probablemente pa ku e parti di pago di multa i gastunan, a bai den apelashon, unda ku ta e intenshon pa hiba e tratamentu aki, den kurso di e dia di mañan.