5 Ulandes oropeo lo kontrolá Kòrsou di 2019 pa 2022

2390
Raymond Knops
Punda—Te ku yüni 2022, gobièrnu di Kòrsou lo ta bou di kòntròl di alto amtenarnan ulandes i institutonan bou di nan maneho. Esaki ta lokual tin tras di e kortina di Raymond Knops, kende porfin a logra pa Den Haag imponé un instrukshon finansiero riba Kòrsou.
Raymond Gradus

Ta trata di e hòmbernan i institutonan ulandes, Harren Haarsma direktor di RVO, Wouter Bos direktor Invest-NL, Raymond Gradus presidente Cft ehekutor kòntròl Rft, Bob Traa presidente direktor nobo di CBCS Banko Sentral i finalmente Raymond Knops sekretario di estado pa Relashonan den Reino. Tras di lokual Kòrsou a firma ku Raymond Knops djabièrnè siman pasá 12 di yüli tin un struktura i no ta koinsidensia ku e struktura aki a bini promé di yega na un Areglo di Disputa den Reino. Knops i Ulanda lo tin hopi kòntròl riba e maneho finansiero ekonómiko di Kòrsou. Esaki lo dura te ku yüni 2022. E ulandesnan, mediante un banko ku tei haña pèrmit na Kòrsou, Invest Curaçao, lo tin akseso na 180 mion florin dirèkt fo’i fondonan ulandes,  60mion fo’i benta di UTS i riba 150 mion florin mas despues ku bende 40% den CPA. Ademas via di Banko Sentral, CBCS, tin destiná 200 mion dòler, 360 mion florin riba kuentanan di fris ya asigná pa bai den kaha di gobièrnu di Kòrsou. E informashon aki a wòrdu konfirmá den korte sivil den kaso di Corbiere vs Banko Sentral. Abogadonan den korte representando Banko Sentral a konfirmá públikamente ku tin 360 mion florin asigná kaba pa subi kuentanan di gobièrnu. Di e suma aki un parti chikitu lo bai St. Maarten.

Bob Traa

Si Ulanda eksihí pa e suma konfiská na Banko Sentral tambe bai Invest Curacao, en total ta papiando di 650 mion florin bou di kòntròl di e ulandesnan oropeo pa invertí den ekonomia lokal. 180 mion florin for di fondonan ulandes, 60 mion for di UTS, 50 mion for di benta CPA, 360 mion florin for di Banko Sentral. Si lesa “tussen de regels”, manera nan mes ta bisa, e akuerdo firmá ku Knops ta un plan ku tin hopi derivado. Na promé lugá Knops ta bisa ku e struktura di garantia ku Invest Curacao tei ópera den dje ta kai dirèkt bou di RVO na Ulanda. RVO ta Rijksdient voor Ondernemingschap i ta wòrdu manehá pa Harren Haarsma. Haarsma i RVO na Ulanda, lo ta esnan enkargá pa garantisá invershon di por lo ménos 650 mion florin durante 2019 pa 2022, den kual 470 mion ta fondonan akoplá fo’i benta di propiedat kurasoleño. Sin aprobashon di RVO, niun proyekto no tei sigui.

Harren Haarsma

E di dos pilá den struktura di Knops ta Wouter Bos, eks lider polítiko di PvdA. Bos ta direktor di Invest-NL, kende su funshonarionan aktualmente ta trahando pa establesé Invest Curacao. Mediante artíkulo 5 di e kombenio firmá, Ulanda a instruí Kòrsou, pa kapitalisá e instituto Invest Curaçao. Esaki lo duna Kòrsou derechi pa fia for di fondonan ulandes, un suma di 180 mion florin repartí den 3 aña. Invest Curaçao tei risibí e suma di 180 mion pa yuda stimulá ekonomia via di e kuenta di kapital. Ademas, Invest Curaçao tei risibí adishonal 60 mion florin for di e benta di UTS. Den mesun artíkulo, insiso 3, Ulanda ta instruí Kòrsou pa sigui kapitalisá Invest Curaçao, for di tur medionan originá mediante benta di propiedat i kompanianan anónimo gubernamental. Na dado kaso si ta nesesario, for di e benta di propiedat i kompanianan, Instruktornan Finansiero ulandes ubika na Ministerio di Finansa por instruí pa finansiá tambe e kuota di debe atrasá.

Wouter Bos

Artíkulo 5 den su totalidat ta evitá envolvimentu di bankonan di desaroyo komo Korpodeko i OBNA. Invest Curaçao ta bira un kopia modelo di e sistema Invest-NL.  Ekspertonan envolví den Invest-NL ta formando e malchi organisatorio pa ehekushon di Invest Curaçao. Segun artíkulo 5, ta Invest Curaçao tei bira e instituto pa kontrolá invershon  prosedente di fondonan gubernamental. Atraves di un agènda di invershon (insiso 2), kada 6 luna Kòrsou mester presentá proyektonan ku ta bini na remarke pa stimulashon di ekonomia. Invest Curaçao tei kasi dirèkt bou di supervishon di Banko Sentral.

Momentu supervishon di Invest Curacao bin kai bou di supervishon di Banko Sentral’ e di tres pilá di Knops ta drenta den persona di Bob Traa, presidente direktor di CBCS. Ademas, Traa entrante sèptèmber ta pendiente un desishon si CBCS por manda 200 mion dòler pa gobièrnu di Kòrsou. E suma tei kai dirèkt bou di instrukshon i riba kuentanan di Invest Curacao.  Rijksdients voor Ondernemend Nederland (RVO) tei keda enkargá pa forma i vigilá e instrumento i struktura di garantia relashoná ku e bolsa di fiansa aktivá serka Invest Curaçao. Manera ya menshoná e promé fase pa kapitalisá Invest Curaçao ta mediante 60 mion florin prosedente for di benta UTS. E instrumento di garantia, manehá pa RVO, ta determinante ehekushon di e proyektonan proponé. Te intenshon pa laga Invest Curaçao, kontrolá maneho na Korpodeko, OBNA i CDI. E problema mas grandi ta ku Invest Curaçao, ta un kopia di e modelo na Ulanda, Invest-NL ku ainda no a start despues di a keda instituí na 2017. A tuma e ulandesnan kasi 2 aña pa finalmente por a anunsiá na mei 2019 ku nan tei start. N’e momentunan aki, Invest-NL tin un bolsa di 2.3 miar euro pa ekstendé na fiansa, pero polítika i diskushon interno ta formando un problema grandi. Wouter Bos, eks lider polítiko di PvdA, a keda apuntá komo direktor di  e instituto. Un di dos problema pa Invest Curaçao ta e ròl ku RVO di Ulanda tei hunga riba e struktura di garantia. Ademas, te ainda no a informá pueblo di Kòrsou ta ken tei bira direktor di e banko ni tampoko si Ulanda ta eksihí posishon den e Hunta di Komisario. Finalmente, Raymond Knops ta hañá sosten kompleto di Raymond Gradus, aktual presidente di Cft.