Demanda 8 aña pa hòmber ku violá su ruman muhé

5907
El a skucha demanda basta serio.
WILLEMSTAD,— Ayera korte a trata kaso di e hòmber Daniel de P. unda ta sospech’é di a violá  propio ruman muhé miéntras tambe lo mester a violá un dama mas.

E sospechoso a presentá ayera dilanti wes unda e la bisa ku un polis lo a gaña riba dje den e kaso aki. Segun su deklarashon ku e  víktima nan den e kaso tambe ta gaña unda el a bisa ku e tin algun foto i video den su telefòn ku ta indiká ku nan no tabata drogá i tabata konsiente di tur kos. Ministerio Públiko ta akusá de P. di a tene relashon ku e víktima na momentu ku e no tabata konsiente.

Wes a trese dilanti den e kaso aki ku asta ora bo tin relashon ku un persona, si  bo tene relashon kuné na momentu ku e no ta konsiente  bo ta kastigabel. Ruman di e sospechoso de P. lo a bisa ku e no ta kòrda kiko tur a pasa riba e dia ei i ku ta e ta djis kòrda ku e tabata huntu ku e sospechoso unda despues el a bin lanta riba kama di e de P.

El a bisa ku mesora manera el a lanta for di  soño el a yama su mama pa buska, unda den stèm di e dama e mama por a skucha ku e ta den peliger. Esaki mirando ku e dama lo a bisa su mama pa bin busk’é mesora, unda mesora el a bai hasi denunsia na polis pa violashon. Segun amiga di e dama tambe ku e dama lo tabata hopi nervioso riba e dia en kuestion.

E sospechoso durante e tratamentu a bisa ku su ruman ta gaña i ku riba e foto por mira klaramente ku e tabata konsiente. E investigashon di e kaso kontra de P. a bira mas grandi despues ku a bin haña vários video den su telefon, unda a asta habri un kaso mas kontra di dje. Segun fiskal den un video den telefon di e sospechoso por mira klaramente ku e víktima no tabata konsiente.

E fiskal ku ta na enkargo di e kaso esta mr. Dennaoui a trese dilanti ku tin 3 parti di e video ku por mira ku e dama no tabata reakshoná. El a splika ku den e grabashon por a mira kon e dama tabata kompletamente for di dje, miéntras e sospechoso a sigui ku su aktonan seksual kontra di e dama. El a bisa ku esaki ta kastigabel mirando ku e dama mes a deklará ku e no ta kòrda nada di e anochi i ku ta te ora el a lanta for di soño el a bin nota ku e la wòrdu violá pa su propio ruman hòmber.

Tambe a uza  deklarashon di mama di e víktima kontra di e sospechoso, unda e mama lo a bisa ku su yu a bèl spantá i bisa ku el a wòrdu violá pa su ruman hòmber. De P. mes a para ariba ku e tabatin un relashon skondí ku su ruman i ku niun hende no tabata sa esaki. Segun su deklarashon ku tabatin mas persona ku tabata sa ku for di aña 2017 e tabatin un relashon skondí ku su ruman muhé.

Fiskal mr. Dennaoui a bisa ku e echo aki ta kastigabel i e sospechoso tambe ta kastigabel, unda el a bisa di lo pidi un  kastigu basta haltu mirando e gravedat di e echo. El a pidi un kastigu di 8 aña di prizòn pa de P. kitando e parti ku ya el a sinta kaba.