Reshèrshinan investigando e vehíkulo ayera
Norkan – Outoridat polisial ku asistensha di kompanianan priva a logra saka un pikòp fo’i laman di shut. Den e pikòp tabata restunan mortal. E akshon a tuma lugá ayera mainta tempran kuminsando for di mitar di nuebe mainta.

Manera menshoná, for di oranan tempran ayera a kuminsá ku e preparativonan. Bushinan di polis huntu ku mas bushi profeshonal kompañá pa un kran i funshonarionan di TOD a start planifikashon. Esakinan a sosodé den kompania di e patólogo farisaiko. Alrededor di 10 or di mainta un kantidat di 4 bushi a bula den olanan brutu na Shut. Esaki a enserá tambe bushinan di Industrial Diving.  Ta sospecha ku e vehíkulo tabata na un profundidat di alrededor di 110 pia. Esaki ta eksihí eksperensha amplio di parti di e bushinan debí ku na e profundidat ei nan kapasidat den nan tankinan ta kaba mas lihé ku na ménos profundidat. Mester a uza un asina yamá “liftback” pa por logra pone e outo na kantu pasobra momento e kran tabata hisa esaki e vehíkulo tabata bati kant’i baranka. Pa tal motibu a uza e “liftback” i logra pone e vehíkulo na kantu riba e barankanan haltu di Shut.

Reshèrshi ta tuma saku di pita ku restunan humano

Mesora tabata opvio ku den e vehíkulo tabatin restunan mortal. Investigadónan tékniko huntu ku patólogo a inisiá e investigashonnan preliminar, tantu na e restunan mortal komo na e vehíkulo. Tabatin bastante hende ta para wak e momentu tòg tristu, sakando un kurpa ya sin bida for di e laman. E bushinan na momento nan tabata tratando na mara e vehíkulo a nota un kantidat di wesu humano paden i ront dje vehíkulo. Den un saku di pita a logra skapa esnan ku ainda tabata por a rekohé bou di laman i demas wesu tambe a wòrdu rekohé momento e vehíkulo tabata ariba na baranka. Mester bisa ku e bushinan, Wederfoort i yu huntu ku Anita i un otro kolega tabatin un dia bastante duru debí na laman haltu di Nort, pero tòg a logra hasi e trabou.

Bushinan den laman na nòrt ayera

E vehíkulo a wòrdu deskubrí despues ku un sambuyadó ku sa sambuyá  ku frekuensha den e laman brutu di Shut na unda e ta buska kref a bin tuma nota di un vehíkulo den fondo di e laman. Ta konosí ku den e fondo di laman di shut tin yen outo i òf kaska di outonan benta despues ku ladronnan kaba di pluma esaki ta benta nan na laman. Pero den e kaso aki e sambuyadó a tuma nota di un pikòp ku ainda ta den un bon estado. Ta trata di un pikòp Ford.  E sambuyadó a tuma nota di e number ku ta pega riba e vehíkulo i mesora a suministrá esaki na outoridatnan ku a kuminsá ku nan investigashon. Por a saka afó ku e vehíkulo i tambe e doño di e vehíkulo aki ta pèrdí for di aña pasa den e último kuartal di aña. Ta trata di un hòmber ku asta polisnan a saka un komunikado d búskeda debí ku famianan a denunsia ku e ta pèrdí. E kaso ta sigui bou di investigashon. Nos mas sentido pésame ta bai na famianan di e defuntu.