Drone yená ku droga konfiská i dos hòmber detené

1143
Koralspecht- Ayera bon trabou di polis i di siudadanonan atento na momentu ku a mira drone bulando den e area di prizon. Ya pa basta tempu kaba ku tin e fenomeno di bula drone i benta paketanan yena ku droga den prizon. Polisnan ku ya tabatin pista di esaki ayera a logra di pone man riba dos homber ku a hasi nan mes kulpabel na e echo aki.

Tabata alrededor di 15.47, Sentral di Polis a risibí informashon ku den área di Koraal Specht tin un drone ta bulando.  Mesora a dirigí unidat na e sitio i a bin topa ku un outo ku dos hòmber sospechoso aden.  Durante di un kontròl den e outo a bin topa ku un saku ku un drone aden i un kantidat di droga. Tur esakinan a wòrdu konfiská pa mas investigashon. Na e sitio a detené e hòmbernan R.L.B., di 33 aña di edat i L.A.P., di 24 aña di edat, ámbos nase na Kòrsou.  A presentá e sospechosonan dilanti di un fiskal ouksiliar, ku a ordená nan enkarselamentu pendiente di mas investigashon.  Seguidamente a sigui ku dos entrada hudisial na kas di e sospechosonan pa asin wak kiko mas por haña ku ta di importansha pa e investigashon. Polis di e tim di mantenshon mester a bai na un kas den Juan Hato na Kaya Goupia kaminda mester a listra den e kas. Akinan no a bin topa ku nada partikular. Seguidamente a sigui pa e di dos adrès na Kaya Kreuzer na Souax kaminda ku despues di basta buska a bin topa ku den un quad parti pafó di e kas un kantidat di bala. Mesora esakinan a keda konfiská. Polis a konfiská e quad tambe pa demas investigashon.