Kiebro den dos negoshi den Saliña

407
Saliña- Ayera den oranan di mardugá ladronnan tabata bastante aktivo, mirando ku nan a bishita dos pakus pareu den Saliña. Tabata den oranan di mainta ku e propietarionan di e negoshinan mester a yega i topa ku e situashon ku mester a hasi un desaster den e dos negoshinan aki.

Ta trata di e negoshi Big Bella i tambe Feelings Fashion ku den oranan di mardugá ladronnan mester a baha via di dak i drenta den e negoshinan aki. Pa loke ta trata Big Bella ku ta e promé negoshi ku nan mester a bai den dje nan mester a bai ku algun asesorio i oloshi. E daño den e negoshi aki no tabata hopi. Pa loke ta e negoshi bisiña kual ta Feelings Fashion nan mester a fiesta den e negoshi aki bayendo ku mas di 800 dòler na merkansia kual ta trata masha hopi djins i asesorio, tambe mester a bai ku alrededor di 500 florin ku tabatin den e kaha di plaka na sèn los.

Un destrukshon formal e malechornan aki a hasi den e negoshi kibrando mas ku un kaminda di e dak pa asina nan por a drenta den ámbos lugá. Tambe nan mester a bai ku e aparato ku ta graba e kamaranan. Polis a bai na e sitio i a tuma keho, miéntras e tim forensiko di polis a kontinuá ku e investigashon.