Hòmber algun luna morto den kas

929
hòmber (70+) algun luna kaba morto den kas
ARNHEM—Habitantenan di e bario Presikhaaf na Arnhem ta den shòk despues ku a deskubrí un bisiña morto den kas despues di algun luna.

Bisiñanan a kere ku e hòmber tabata ku vakashon na Spaña. Segun prensa regional e hòmber ta di desendensia spañó. Ayera polis a hañe despues di un tep di un bisiña. Henter dia outoridatnan tabata presente entre otro pa limpia e kas segun Omroep Gelderland. E tabata un shòk pa henter e bario, asina un bisiña serka a informá. Segun un otro e hòmber tabata riba 70 aña i no tabatin masha amistat, solamente ku su bisiña pega ku su kas. Pero kon por ta posibel ku un hende ta morto algun luna den su kas sin ku bisiñanan ripará i no sinti e holó. Pero algun bisiña ta bisa ku no a sinti holó i otronan a kere ku e tabata den eksterior. Ta ora un bisiña alerta a yama doño di edifisio esaki a yama polis. Agentenan a haña e kurpa sin bida den e kas. Ku sierto frekuensia ta haña hendenan morto den kas despues di basta luna. Den un kas na Amsterdam-Slotervaart a haña un dama morto den kas di 84 aña ku tabatin ya 6 luna morto. Na Rotterdam-West a haña un dama morto den un kas den 2013 ku tabatin ya 10 aña morto.