Kontesta abrí na karta di e komunidat LGBT

Na e Komunidat LGBT di Kòrsou,

2525
Mgr. Luis A. Secco, Obispu di Willemstad

Mi a tuma nota di boso karta abrí i dirigí na mi persona. Ta importante pa mi indiká ku den boso karta boso ta rekonosé ku boso ta konsiente di e posishon ofisial di Iglesia Katóliko.

Komo Obispu di Willemstad ta esaki ta e posishon ku mi ta defendé i a ekspresá na e manifestashon. Mi ta para responsabel pa loke mi a ekspresá, esta e balor di Famia ku ta inisiá pa medio di Matrimonio entre un hòmber i un muhé. Ta esaki ta e debate ku tin ku ser hibá sin insinuá ku, pa motibu di Iglesia Katóliko su posishon ofisial, esaki outomátikamente tin ku nifiká ku Iglesia Katóliko tin ménos apresio, òf ta diskriminá un persona ku tin orientashon homoseksual.

P’esei mi ta bolbe reafirmá ku Iglesia, manera un mama i maestra meimei di tur konfushon moral, tin e gran mishon i responsabilidat di siña e bèrdatnan segun e plan di Dios ku ta elevá i enrikesé hende i sosiedat. Enkuanto matrimonio, Iglesia ta siña ku esaki ta e plan di Dios for di prinsipio di mundu. “Na prinsipio, ora Dios a krea hende, El a krea nan hòmber i muhé…nan dos ta forma un solo kurpa…p’esei loke Dios a uni, hende no por separá” (Mk. 10:6-9). Ta nifiká ku Dios a krea mundu di tal forma ku e realidat di matrimonio ta forma un parti integral di kreashon asina ku si mishi kuné, ta mishi ku henter kreashon. Komo plan di Dios matrimonio ta un realidat asina bunita i perfekto ku nada ta falta den dje. Ta hende, bou di influensia di vários ideologia, filosofia, ideanan eróneo i otro faktornan kultural, sosial etc. ta daña i destruí e plan akí di Dios manera nos mundu di awe ta mustra ku tur su intento i gritunan pa kambia e nifikashon i definishon di matrimonio.

Matrimonio ta un institushon natural establesé pa Dios, e Kreador, ta un aliansa den kua un hòmber i un muhé ta forma ku otro un union pa henter nan bida largu ku ta ordená pa dos propósito inseparabel: e bon di e esposonan i prokreashon i edukashon di e yunan (Kanon 1055). Ta pesei, ta solamente entre un hende hòmber i un hende muhé ku matrimonio por eksistí. Pasobra e struktura natural di seksualidat humano ta hasi un hòmber i un muhé un pareha ku ta komplementá otro den transmishon di bida humano. Ta solamente e union entre hòmber i muhé por ekspresá e komplementariedat seksual ku Dios ta deseá pa matrimonio. Pues e union di e mes sekso ta kontradisí e naturalesa di matrimonio pasobra fuera di esaki i ku falta di e komplementariedat akí, tampoko e no por logra e propósito natural di union seksual. Pa e motibu akí e union di e mes sekso nunka no por ta igual ni tampoko por kuadra ku Dios su plan riba matrimonio i famia.

Konsekuentemente, un gobièrnu ku ta pone e union akí di e mes sekso riba e mes nivel igual ku matrimonio ta aktua arbitrariamente i ta bai kontra su debernan pa bienestar komun. I aki mi ta bolbe enfatisá: no ta Gobièrnu ni tampoko lei di estado a krea matrimonio sino mas bien, rekonosiendo e bienestar komun di e institushon akí, a bini ku lei netamente pa protegé Matrimonio i Famia. Ta esaki ta e espíritu di artíkulo 26 di nos areglo di Estado, den kua su preámbulo ta duna di konosé e ròl importante di Dios. Kere den Dios no ta nifiká kere djis den un bèrdat ku sea ta kumbiní nos, ni tampoko duna interpretashon kontrario na loke enbèrdat e palabra di Dios ta para p’e.

Pa loke ta trata kualke proposishon porehèmpel e “Geregistreerd Partnerschap”, Iglesia, di su parti ta respetá esaki komo un derecho humano, pero no ta rekonosé kualke tipo di union envolví den e aspekto akí komo bálido den bista di Dios. Nos ta di akuerdo den separashon di Estado i Iglesia pasobra e ta netamente un disiplina di Iglesia, pero tambe mi ke kòrda ku Iglesia Katóliko ta keda parti di Estado komo un di e pilarnan importante pa desaroyo di nos komunidat ku su derecho pa manifestá su opinion i ta partísipe den tur diálogo ku tin di haber ku bienestar komun.

“Si mi a bisa algu robes, mustrami ta kiko. Pero si mi a papia bèrdat, pakiko bo ta dal mi antó? (Huan18:23), ku e palabranan akí di Hesu-Kristu mi ke bolbe enfatisá no solamente boso di e komunidat LGBT Kòrsou, pero tur e lidernan spiritual di henter nos komunidat pa den e debate akí, nos pone atenshon kompleto riba loke realmente ta e tópiko, esta Matrimonio komo base di establesimentu pa Famia. Esaki no solamente for di e punto di bista Kristian Katóliko sino tambe sosio-kultural di nos komunidat ku semper nos a kere, transmití i biba.

Manera mi a indiká den diferente komunikado, ta nos deber di aseptá i respetá kada persona sin importá su orientashon. Tur persona ta meresé rèspèt i komprendementu, amistat i hustisia sin kambia e bèrdat i e plan di Dios.

Den e palabranan di Papa Fransisco, “Si un persona ta homoseksual i e ta buska Señor i tin bon boluntat, ken ami ta pa husg’é?” mi ke rekordá tur persona, ku buska Señor ta nifiká aseptá e bèrdatnan i e plan di Señor ku semper ta hasi nos liber. Pasobra inklushon semper ta nifiká ku bo no ta solamente parti di un komunidat sino tambe parti di e plan di Dios.

Si ta den e espíritu akí boso ta hasi un invitashon pa un diálogo, mi ta semper abrí p’e.