Mas di 30 persona a pasa kurso di maneho di shelter ku éksito

Entre nan miembro di Krus Kòrá Kòrsou, SOAW i ADRA

442
E grupo ku a pasa nan resultado ku eksito.
Willemstad-  Durante di wikènt último, mas di 30 persona tabata den un kurso intenso organisá pa Krus Kòrá Kòrsou. E kurso aki ta relashoná ku diferente preparashon ku ta tumando lugá aktualmente pa ku temporada di orkan.

E kurso ku a hiba e tema “ Maneho di Shelter” inkluyendo diferente tópiko di importansia pa tur persona ku lo mester manehá un shelter òf yuda den esaki. Entre otro Sr. Lesley Fer di Direktorado di Kòntròl di Riesgo & Maneho di Kalamidat na Kòrsou, Sr. Jairo Silberie di Obranan Públiko (DOW) i diferente oradó mas a duna un presentashon amplio pa ku temporada di orkan, kiko tur esaki ta enserá i tambe tur preparashon ku ta tumando lugá. Finalmente e wikènt di kurso a sera ayera ku un rekorido na tur shelter i opvang ku tin aki na Kòrsou.

Despues a entrega mas di 30 persona di Krus Kòrá Kòrsou, SOAW i tambe ADRA nan sertifikado despues ku nan a pasa e kurso ku éksito.