Hopi hende no sa mes Justin Dambruck i Gedionne Marlin ku tremendo aktuashon pa selekshon di Hulanda U-15

314
Justin Dambruck den e torneo U-15 European Championship hungando pa e slekshon di Hulanda a kaba ku 4 hit den 10 turno bon pa un promedio di .400 i el a empuhá 7 kareda i tambe risibí 7 base por bola i roba un base den dos intento.

Willemstad,–  Ta hopi hóben yu di Kòrsou tin ku ta destaká den e deporte di beisbòl i hopi biaha tin ku no ta tende di dje fásil.

Den e kaso di e hóben Justin Dambruck, yu di èks pelotero Dennis Dambruck, el a hunga den di European Championship pa e selekshon di Hulanda U-15 kaminda nan a bin terminá ku rèkòrt di 4-1. E selekshon a pèrdè den kruse kontra Italia ku skor di 5 pa 3 kaminda nan tabata gana 2-0 riba hit empuhado di 2 kareda di Justin Dambruck i e skor a keda asina te den di kuater inen pa despues bon pèrdè e wega i asina keda na di tres lugá bon pa medaya di bròns..

E selekshon a gana Slovakia 15 pa 0, despues nan a gana di Austria 21 pa 0, gana di Repúblika Cheko 13 pa 7 i nan ta bin pèrdè 5 pa 3 kontra Italia pa finalmente gana di Repúblika Cheko un biaha mas ku skor di 3 pa 0.

Justin Dambruck den e torneo aki a kaba ku 4 hit den 10 turno bon pa un promedio di .400 i el a empuhá 7 kareda i tambe risibí 7 base por bola i roba un base den dos intento.

Den 17 turno durante di e torneo e tabata 14 biaha den base i a duna un kátedra den defensa pa su ekipo, poniendo ku hasta fanátiko nan di e ekipo kontrali ku ta Italia a bin felisit’é despues di wega. E tabatin 6 putout den 6 asistensia i no a kometé ni un solo eror.

Justin a sali di tres den slugging pa su ekipo ku promedio di .700. Di tres den promedio ku .400. Di dos den porsentahe di embasá ku .647. Di tres den kareda anotá ku 7. Den kuater den hit konektá ku 4. Di dos den kareda empuhá ku 7. Tambe el a konektá un doblete i un tripel.

Sin duda e tabata un di e mihó hungadónan pa e selekshon hulandes U-15. Justin ta kai den kategoria Junior i no a hunga Little league e aña aki, pero si a praktiká ku Dutch Caribbean Acadamy i a hunga ku e selekshon di RBI.

Na e momentunan aki e hóben Justin Dambruck ta na Hulanda kaminda e ta hungando den e torneo Battle of the Castle ku ta un torneo kaminda ta skohe koach nan i ta manda video di e hungadónan pa e koachnan i nan na nan turno ta skohe hungadónan pa forma kuater tim i nan hunga kontra otro pa saka un kampion di Battle of The Castle. E torneo ta terminá djabièrnè awor.

GEDIONNE MARLIN

E otro hóben ku tambe a hunga pa e mesun selekshon U-15 di Hulanda, tabata Gedionne Marlin kende tambe tabatin un tremendo aktuashon pa e selekshon di Hulanda U-15.

Den e 5 weganan di e selekshon, Marlins a haña 18 turno i el a konektá 7 hit i anotá 7 kareda, miéntras ku el a empuhá 4 pa keda komo e di sinku mihó bateadó di e selekshon. Entre su 7 hitnan, Gedionne a konektá tambe un doblete i 2 tripel, miéntras ku e no a risibí base por bola i a poncha na 1 okashon. Den dos intento di robo, el a roba tambe dos base.

Pa loke ta su defensa Marlins tabatin 6 asistensia i 6 putout, miéntras ku el a kometé un eror i tabata un average di fildeo di .923.

Gedionne Marlin ta tersera base picher i terser bate pa e selekshon di Senior League ku a titulá kampion di Karibe i ku ta sali pa Easley South Carolina djarason awor kaminda nan lo bai pa defendé e titulo mundial ku Kòrsou a logra aña pasa. Marlin aparentemente ya tin dil sera ku e organisashon di Texas i pues ku tur probalidat otro aña ora ku e kumpli 16 aña, e lo pone su firma pa asina bira otro di nos peloteronan profeshonal.