Pa 14/16 hungadó i 3 koach Williamsport ta kubri gastu di tur selekshon den Mundial

421
Willemstad,–  Hopi ta esnan ku ta puntra ken ta kubri gastunan di e selekshonnan ku ta bai hunga Mundial, kual e aña aki lo ta e selekshon di Senior League i esun di Little League kendenan a bira kampion di Karibe.

E kos ta asina ku na momentu ku un selekshon ta bai hunga Karibe, e pais for di kual e ta bini, mester kubri e gastunan di buelo i unifòrm so, miéntras ku ora e selekshon yega na e pais organisadó, esakinan ta kubri tur gastu, pues di estadia, kuminda i transporte. Pues ta solamente e pasashi di avion e pais mester kumpra.

MUNDIAL:

Den kaso di kampionato Mundial, Merka/Williamsport ta kubri tur pero tur gastu, pues e selekshon ku su hungadónan i koachnan ta bai sin gastu, Willliamsport ta kubri e gastu di pasashi, unifòrm, material, hospedahe, kuminda i hasta ta sòru pa e delegashon tin guia (Padrino). Pues pa ta kla pa tur hende. Si e delegashon ta konsistí di esnan ku Merka ta paga pe, Kòrsou òf e pais ku gana nan region, lo no tin niun gastu, a lo ménos si nan kier hasi kosnan èkstra.

Un gastu ku tambe ta kubri den kaso di Little League na Williamsport, ta un traduktor, si es ku e pais ta deseá di biaha ku unu, manera hopi biaha ta e kaso ku paisnan manera Hapon i Kòrsou.