Futuro sosio di CPA ta transbordo di kokaina mas grandi na Oropa

1733
Rekonosé: Ahmed Aboutaleb públikamente a atmití ku haf di Rotterdam ta un haf narkotráfiko i nan mes no tin kòntròl riba dje.
Punda—Port of Rotterdam, kisas  pa e aña aki lo bira un sosio stratégiko di CPA. Segun minister di finansas Kenneth Gijsbertha i konfirmá pa promé minister Rhuggenaath por lo ménos 34% dje akshonnan den CPA lo ta na benta. Un otro sosio lo bira APC, esta Fondo di Penshun di Kòrsou
20% : Rhuggenaath ta konfirmá ku Port fo Rotterdam lo tin 20% di akshon den CPA.

Promé Minister Eugene Rhuggenaath, durante un enkuentro ku prensa siman pasá a duna di konosé ku en bèrdat mester hasi un investigashon di deligensha riba Port of Rotterrdam. Esaki e la duna di konosé “den djente”, despues di mester a kontesta e pregunta si e tabata na altura ku Port of Rotterdam te haf narkotráfiko mas grandi na Oropa.  E haf di Rotterdam ta aloká riba 180 mil empleado, ku ta mas grandi ku e poblashon di Kòrsou. Na área kubrí, ta trata di alrededor di 25 mil tereno di futbòl. Na mei e aña aki, munisipio di Rotterdam a laga e Universidat mas renombrá di Ulanda den komersio, Erasmus Universiteit, hasi un investigashon riba siguridat di nan haf. E estudio a konkluí ku e departamentonan hudisial dje suidat no tin sufisiente kòntròl riba siguridat den Port of Rotterdam. E estudio di Erasmus a wòrdu ouspisiá pa Ministerio Públiko, Duana i Kuerpo di Polis na Rotterdam. Segun e investigadónan na Erasmus por lo ménos un kuart di kokaina importá pa Oropa ta drenta via haf di Rotterdam, e futuro sosio di CPA. Segun direktor di CPA, Humberto de Castro, Port of Rotterdam tin interes pa partisipá lo mínimo den haf. “Ta Kòrsou a aserka nan”, el a duna konosé na Vigilante. Segun Gijsbertha i Rhuggenaath, CPA ke kumpra por lo ménos 20% den haf di Kòrsou.

Mínimo: segun de Castro e interesnan di Port of Rotterdam lo ta mínimo.

Ta práktikamente imposibel pa kontrolá e haf. Segun e universidat, un kantidat di 7.5 mion kònteiner ta pasa den Port of Rotterdam tur aña. Solamente 65 mil di nan ta pasa den skèner miéntras di esakinan ta 4 mil so ta kibra nan seya pa kontrolá aden. Tur anda ta sospecha ku por lo ménos 40 mil kilo di kokaina ta drenta via Port of Rotterdam. Mayoria droga ku drenta e haf di Rotterdam ta den kònteiner di fruta i berdura. Esaki pasobra e kònteinernan aki tin urgensha riba nan i no por para largu den haf debí na fechanan di vensementu dje produktonan konserní.  Durante entrevista ku empleadonan dje haf na Rotterdam, a bin sali na kla ku no tin niun klase di siguridat, ken tin “badge” i outorisashon pa yega na e kònteinernan. Es mas, pa un suma di sèn, ken ku ta por drenta haf i habri kònteiner. Segun un reportahe di NOS, Port of Rotterdam tin diferente video graba unda  por mira kon organisashon narkotráfiko ta drenta haf di Rotterdam ku arma outomátiko i ta kore kònteiner saka sin niun hende interseptá esaki. Resultadonan dje lokual Erasmus a presentá a shòk e munisipio kompleto. Alkalde dje suidat pa 10 aña largu, Ahmed Aboutaleb a duna di konosé di lo biaha pa paisnan di Colombia, Peru i Bolivia pa wak kon por yega na solushoná importashon di kokaina via di Rotterdam.