Nada ku Suzy hasi pafó di Cft no tei haña aprobashon

115
Kòntròl Total: Raymond Knops ta ehekutá lokual Reino Ulandes ke mira, kòntròl total riba e islanan den Karibe. Riba e foto por mira Knops huntu ku pareha real den kompania di Rhuggenaath i direktor di haf de Castro.
Punda—E akuerdo ku Minister Eugene Rhugenaath a firma ku Raymond Knops, ta tene portanan habri pa Ulanda por sigui eksihí di Kòrsou pa bende su propiedatnan. Esaki den forma di aktivonan riba balansa di kompanianan anónimo pero tambe simplemente tereno riba e isla, esta e asina yama “grondontwikkeling”.

Segun Knops su akuerdo, Ulanda ta demandá pa Kòrsou presentá un plan di desaroyo di su terenonan. E plan aki mester keda someté na evaluashon tantu pa Cft, e komishon supervisádo di finansas públiko pero tambe pa e servisio di finansias lokal, dirigí pa funshonarionan ulandes for di Den Haag. No tin ningun duda ku Ulanda ta bini Kòrsou pa “total control”.  Ya kaba pa medio sèptèmber, Kòrsou mester entrega Ulanda un rekuento di proyektonan ekonómiko. Esaki mester sosodé tambe kada 6 luna. Den artíkulo 5, insiso 3 di lokual Knops a obligá Rhuggenaath firma,  ta preskribí e outorisashon pa gobièrnu di Kòrsou bende su propiedatnan i kompanianan anónimo. E resultadonan neto di   benta di tur kompania anónimo i propiedat di gobièrnu, mester keda aktivá riba kuentanan di Invest Curacao. Den artíkulo 7, e akuerdo ta preskribí kon tei finansiá e bankarota di Curaçao Medical Centre, HNO. Esaki lo sosodé atraves di e medidanan fiskal imponé riba e pueblo di Kòrsou. Segun artíkulo 7 dje akuerdo, e défisitnan den maneho di CMC lo bai a kosto di pagamentu di parti di impuesto i medidanan imponé riba pueblo. Pa mas tardá, 1 di òktober gobièrnu di Kòrsou mester entrega un rekuento kon e seramentu di Sehos tei tuma lugá konsiderando e traspaso pa CMC. Knops ke mira e pa gobièrnu kumpli lokual el a kumbiní ku Cft riba e problemátika aki. E sekretario ta hasta menshoná e fecha riba kual a traha e akuerdo, 17 di òktober 2017. De artíkulo 7, por mira klaramente ku minister Suzanne Camelia Romer por traha kalke plan ku e ta deseá pero si esaki no ta konforme aprobashon di Cft, su plan lo no por wòrdu ehekutá. Den otro formulashon, tur proseder ku ta peligrá Kòrsou den su kapasidat pa finansiá e défisit operashonal na CMC tei keda blòkia pa Cft.

Knops ke mira ehekushon di kòntròl riba e medidanan. Esaki lo sosodé mediante di un komishon, kual ta konsistí di un miembro di Kòrsou, unu di Ulanda i un di tres miembro i alabes presidente. E presidente ta wòrdu nombrá pa Kòrsou bou di konsulta ulandes. Pa kada kuartal, e komishon mester duna reportahe di avanse.  E akuerdo ta finalisá riba 30 di yüni 2022.