“Si Colombia stòp di produsí droga e pais ta kaba na nada”

218
Diosdado Cabello, presidente di Asamblea Konstituyente di Venezuela.

CARACAS – E presidente di Asamblea Konstituyente di Venezuela, Diosdado Cabello, a indiká den oranan di ayera ku na Colombia ta reina un ‘narkoestado’ i ku si stòp di produsí droga, e pais bisiña ta kaba na nada.

Esaki a sigui indiká ku e konstrukshon na Colombia ta keda finansiá ku narkotráfiko, durante un rueda si prensa di e gobernante di e Partido Socialista Unido di Venezuela.

Cabello, konsiderá e number 2 di chavismo, a sigurá ku na Colombia ta produsí 70% di droga di mundu, loke ta representá, segun e, un problema grave pa e region.

Esaki a sigui indiká ku na Colombia no tabatin un presidente ku ta asumí e problema aki ku seriedat i ta preferá kulpa bisiñanan. Ademas el a denunsiá labamentu di plaka ku ta bini di narkotráfiko.

Mas aleu el a indiká ku na Colombia ta eksistí un interes pa saka Nicolas Maduro for di presidensia na Venezuela, pa asina por permití e fluho ilegal di narkótiko entre ámbos paisnan. Pues e ta di pensamentu ku nan ke pasa nan droga liber i sin preokupashon via di Venezuela.

Esaki ademas a yama e presidente kolombiano, Ivan Duque, inmoral pues esaki a akusá Maduro di ofresé un santuario pa teroristanan i pa narkotrafikante na Venezuela.

E dirigente chavista a indiká ku Venezuela ta un pais soberano i pa e mesun motibu lo por risibí e eks miembronan di guerilla. Tambe a rekordá ku na Colombia tin vários opositor ku chavismo ta señalá komo terorista.