800 kilo konfiská riba Gaviota Dorada den haf di Kòrsou

567
Mitar: Gaviota Dorada mitar di senk riba laman
Punda—Manera publiká ayera den Vigilante, outoridat di narkótika ta investigá un lote di 800 kilo di kokaina ku a drenta haf di Kòrsou siman pas’a. Entretantu, ayera Warda Kosta di Kòrsou finalmente a opta pa publiká e komunikado ofishal.

Segun e komunikado djárason pasá, 31 di yüli 2019 un barku Venezolano ku dies persona abordo a wòrdu interseptá dor di un Metal Shark di Wardakosta den awanan teritorial di Kòrsou. Durante di e intersepshon e barku a kuminsá senk. E dies personanan di diverso nashonalidat  a wòrdu transportá pa e Punto di Sosten di Wardakosta unda a entregá nan na KPC. Despues a tou e barku, ku ya tabata mitar bou di awa, ku e cutter Jaguar di Wardakosta pa e pir na base di marina na Parera.

Transportá: transportando e pasaheronan di Gaviota rumbo pa e punto di sosten di Warda Kosta.

E siguiente mainta, 1 ougùstùs 2019, a saka e barku ku ayudo di sambuyadónan di Defensa i kuerpo di bombero di Kòrsou a pòmp saka e awa. Pa despues personal di Wardakosta huntu ku un tim di Zr.Ms. Groningen i Duana a listra e barku minusiosamente. Esaki a resultá den un hayasgo di mas ku 800 kilo di kokaina den un kompartimentu skondí den e barku. Entretantu e droga a wòrdu distruí riba òrdu di Ministerio Públiko i e pasaheronan awor ta wòrdu konsiderá komo sospechoso.

Ta trata di e barku “di fruta” Gaviota Dorada ku tabatin 10 persona abordo. Na momento e Metal Shark a logra interseptá e boto, tabatin problema durante e traspaso di e pasahero pa e Metal Shark, unda a opta pas kuminsá trese e pasaheronan kantu. Via di Bahia Santa Ana a habrí brùg Emma pa e Metal  Shark por a pasa. Tur 10 pasahero tabata sintá patras riba e Metal Shark ku personal di Warda Kosta hibando un vigilansha estrikto riba nan. Despues di  a trese tur pasahero sano i salvo na waf di Warda Kosta, manera menshoná entrega tur hende na Kuerpo di Polis. Entretantu a ordená e Cutter di Warda Kosta Jaguar pa trese e barku aden. A mara Gaviota Dorada patras di e Cutter i den oranan tempran di anochi a saka un Metal Shark pa warda yegada di Jaguar ku a tou Gaviota Dorada pasa sin ningun insidente via di haf. Gaviota Dorada a pasa den awanan di Santa Ana, ya kaba mitar di senk. Siguiente dia a bin deskubrí e lote di 800 kilo riba e barku di fruta. E kaso ta sigui bou di investigashon.