Kenneth: “Invest Curacao ta leu foi kla”

566
Punda—E banko Invest Curacao ku gobièrnu ulandes ke obligá Kòrsou na instituí ta leu fo’i kla. Esaki ta lokual minister di finansas Kenneth Gijsbertha duna di konose na Vigilante siman pasá despues di un rueda di prensa.

“Ku wènkbrou hisá e minister a puntra Invest Curacao?, esei ta leu fo’i kla”, el a duna di konose. Pero den un otro komentario, segun Promé Minister Eugene Rhuggenaath, ta hende lokal lo sinta den Hunta di Komisario di Invest Curacao pero tambe lo tin un direktor lokal. Segun e promé minister tur kos rondó dje banko ku ainda mester bini, lo ta den man di Kòrsou.

Invest Curacao, ta e banko ku Ulanda ke mira bini pa stimulá ekonomia na Kòrsou. Na e momentunan aki funshonarionan di Invest NL ta dunando konseho kon pa hasi meskos na Kòrsou, mediante Invest Curacao. Invest Curacao, lo bira e banko unda mayoria fondo prosedente di benta di propiedatnan i kompanianan anónimo di Kòrsou lo keda ubika. Knops i Ulanda a eksihí di Kòrsou pa depositá sigur 60 mion florin fo’i benta di UTS riba kuentanan di Invest Curacao, via di Curaçao Development Institute. Tambe Ulanda lo pone na disposishon un suma di 180 mion pa finansiá proyektonan ekonómiko miéntras ta pendiente benta di 34% adishonal den haf di Kòrsou, kual segun Rhuggenaath tambe lo subi kuenta di Invest Curacao.