Konsehero nobo den HNO presupuestá na riba 1 mion florin

323
Otrobanda—Peter Bos, a bira e konsehero nobo di Curacao Medical Centre. Bos a drenta despues ku EY Ulanda a entrega nan pakete di servisio na maneho di CMC. Hunta di Komisario a opta pa stòp ku EY Ulanda i kontratá un otro konsehero. Bos ta sosio di e ofisina ulandes, di Ausserhoferbos.

Bos mester kaba ku e trabounan pa implementashon di lokual EY a finalisá. Durante e proseso di kambio ta bini hopi kambio den prosedura di kuido kompará ku SEHOS. EY Ulanda konsekuentemente a entrega tur e prosesonan di kuido riba 24 teritorio spesialidat. Esaki a inkluí 184 akordashon di trabou, konteniendo spesifikashon di kon kada asistensha den tratamentunan médiko mester atendé inkluso e médikonan. EY Ulanda a hasi un bon trabou, pero na mart mester a finalisá nan kontrakt debí ku Ballast a informá CMC ku nan no tei kaba e edifisio na tempu. Konsekuentemente, e spesifikashon hasi dor di EY mester a warda pa inisiá e trainingnan práktiko durante mudansa di edifisio bieu pa esun nobo. EY Ulanda a pasa tur kos over den bon komprondementu ku gerensha di CMC. Un otro sla pa reorganisashon di hòspital nobo CMC, ta un desishon di maneho dje instituto pa saka EY Ulanda komo konsehero i hinka e kompania Ausserhoferbos den e proseso. Ausserhoferbos tin e konsehero Peter Bos komo sosio. E desishon di kambio ta unu peligroso debí na e grado di difikultat pa ehersé prosesonan di kambio den instituto di kuido. Ta trata di kambionan organisatorio unda kada konsehero ta apliká nan modelo di kambio. Mirando e proseso ku ta andando, ta un desishon di hopi riesgo a tuma di saka EY Ulanda ku a ya a kobra miónes pa nan inisial implementashon i diseño di kambio pa por un otro konsehero.

Fuentenan no ofishal a señalá na Vigilante ku e desishon aki ta unu no tuma pa e direktor aktual Hans di Kedzierski manera anterior a splika sino den Hunta di Komisario a tuma e desishon. Kedzierski, aktualmente ta den funshon di Presidente di Hunta di Maneho Médiko na HNO/CMC. Huntu ku Peter Bos e ta enkargá awor pa implementashon di e struktura nobo pa manehá CMC. Durante proseso di kambio organisatorio tin 3 fase importante. Diagnostiká, Diseño i Implementashon. E dos promé fasennan ya ta tras di lomba i a kosta riba 11 mion florin, unda Berenschot so a tuma 8 mion na su enkargo si kaba e trabounan. E fase di implementashon ta enserá e.o. ehekushon di e kontenido ku EY Ulanda a finalisá. Pa esaki tin un presupuesto di entre 1 pa 3 mion enkargá, kual Peter Bos ta e konsehero nobo pa asistí den Implementashon.