Ma papia ku tur músiko di SO i nan a bisami ku nada no ta pasando

491
E ta keda kere den palabra di su músiko nan.

WILLEMSTAD,—-No ta un sekreto ku ya pa mas i dos siman tin asina tantu rumor nan den kaya rondó di e agrupashon musikal den ámbito di Kòmbèk Sabor “S.O.”Original. Esaki mes a pone ku ‘E Mulina’, a drenta den kontakto ku gerente di e banda ariba menshoná ku ta Jhonny Brion.

T’asina ku ‘E Mulina’, a papia ku Jhonny i nos a bisé ku den kaya tin diferente rumor nan ta kore rondó di bo banda i kiko ta bo pensamentu nan rondó di tur e rumor nan ku tin den kaya, Jhonny a bisa ‘E Mulina’, lo siguiente.

” Te asina leu ku ami sa, mi a papia ku mi integrantenan i nan a konfirmá mi ku no tin nada ta pasando ku “S.O.”. Pero loke ku ami por bisa ta ku kada ken tin e derechi pa hasi lokual ku nan haña ta bon, i ami lo no bai bisa niun hende nèt, nèt nada. Mi ta maginá mi mes ku ta hende grandi nos ta i si tin algu djis laga “S.O.” sa, pasobra  kon ku bai i bini bida ta sigui drai normal i farándula tambe ta sigui drai”.

Mas aleu Jhonny a bisa ‘E Mulina’, ku “Mes un kos ku abo ta tende e kos nan den kaya, mi tambe ta tende, for di diferente kanal mi tambe ta haña diferente informashon, i práktikamente tur ta papia di e mes un persona, pero mi ta bolbe bisabu ku mi a papia ku tur e músiko nan di “S.O.” i kada un di nan a konfirmámi ku nada pero nada no ta pasando, pues ami komo hende grandi mes un kos ku nan, mi ta bai tras di nan palabra”.