14 persona heridá despues ku bùs di pasahero ta bòltu na Veracruz

288
Aparentemente e shofùr tabata manehá ku un ekseso di velosidat.

CIUDAD DE MEXICO – Un bùs di pasahero a bòltu na e karetera federal di e Ciudad Mendoza-Tehuacan, den e límitenan di e estadonan mehikano di Veracruz i Puebla, lagando saldo di 14 persona heridá atras. Esaki nan niun no tin heridanan di gravedat òf ku ta pone nan bidanan den peliger.

Segun a keda indiká pa medionan di komunikashon mehikano, e pasaheronan ku tabata biaha den e vehíkulo, kua tabata pertenesé na e kompania di ‘Autobuses Unidos’, a revelá ku e shofùr tabata manehá esaki ku un ekseso di velosidat. Tabata pa e motibu aki ku el a pèrdè kontrol na un kurva di e outopista.

Protekshon sivil di e estado di Veracruz a informá via di su kuenta di Twitter, ku e personanan ku a resultá heridá, tur a keda trasladá inmediatamente pa un sentro médiko den serkania i ku niun di esaki nan su bida no ta na peliger.

Mas aleu a indiká ku e investigashonnan den e kaso aki lo kontinuá.