‘Blokeo di Estádos Unídos ta pa protehá venezolanonan’

113
Guaidó, kende ta keda sostené pa mas di 50 pais, inkluí Estádos Unídos.

CARACAS – E kabesante di Parlamento di Venezuela, Juan Guaidó, rekonosé komo presidente interino di e pais pa mas di 50 diferente nashon, a manifestá ku e blokeo total di bienesnan estatal venezolano den teritorio estadounidense, anunsiá pa e atministrashon di Donald Trump, ta buska protehá venezolanonan.

Segun e opositor a indiká den un komunikado, publiká den oranan di ayera, e akshon aki ta buska pa protehá tur venezolano. Esaki ademas a sita reakshonnan riba retnan sosial poko despues ku e notisia a bira konosí den oranan di djaluna anochi.

Segun e, e desishon tumá pa Estádos Unídos ta e konsekuensia di e soberbia di un usurpashon inviable i insolente di Nicolas Maduro, na kua e atministrashon di Trump i mas di otro 50 pais, no ta mira komo legítimo.

El a sigui indiká ku tur persona, kompania, institushon òf nashon ku ta pretendé di hasi negoshinan ku e régimen, pa efektonan di hustisia internashonal, lo ta kolaborando i sosteniendo un diktadura. Esaki nan lo keda kastigá ku un sanshon i lo keda mirá komo kómplise di krímen.

E opositor ademas a bisa ku e blokeo aki tin eksepshonnan humanitario relashoná ku kuminda i medisina, dos kos ku ta di skarsedat na Venezuela i ku ademas e ta protehá e sektor privá di no hasi negoshi ku un diktadura.

E gobièrnu di Trump no a detayá den su òrdu ehekutivo kua bienesnan Venezuela ta mantené den teritorio estadounidense i komo konsekuensia, tambe ta tuma parti di e medidanan.

E prinsipal aktivo estatal venezolano na Estádos Unídos, e petrolero Citgo, ya tabata blòkiá for di yanüari último debí na sanshonnan ku e gobièrnu di Trump a imponé kontra Petrolio di Venezuela, PDVSA.

Guaidó a sigurá ku e blokeo di Sitgo i tur e aktivonan ta protehá. Ademas, tur debe ku e régimen tin pretendé di kontraé ku e aktivonan di a nashon, lo ta kompletamente ilegal.