E gimnasta hulandes Céline van Gerner a anunsiá su retiro

116
Céline van Gerner a anunsiá su retiro for di gimnasia.
AMSTERDAM – E gimnasta hulandes Céline van Gerner ayera a tuma e desishon di stòp ku su karera komo gimnasta. “Despues di dieshete aña aktivo mi ta pone un punto tras di un episodio hopi bunita.

Apesar ku pa hopi e weganan olímpiko di Tokyo ta den kurpa, Céline van Gerner ta sigur di su desishon. “Plaser, kompromiso i e boluntat ta primordial pa por logra un bon prestashon. Mi a kuminsá tuma nota ku mi no por a entrega mi mes 100 porshentu i mi mester ta honesto ku mi mes i tambe ku mi kompañeronan di ekipo”, asina Van Gerner a komentá riba su wèpsait.

Van Gerner (24) durante e último aña a realisá diferente operashon despues di algun leshon na ènkel i su tendon di akiles i esaki a pone pèrdè algun kompetensia importante.

“Durante e temporada tras di lomba mi a analisá mi mes hopi bon. Kiko ta loke ku mi ke? Unda lo mi saka e energia pa logra esaki? Mi ta stima e deporte aki, di su variedat. Pero ya mi no por a kumpli ku mi kompromiso di tur dia. E último tempunan mi tabata pará ku un pia den e sala di gimnasia, pero na mes momentu mi tabata atendé por parti ku mi bida despues di mi karera di gimnasta. Ta un desishon hopi difísil, pero ta esun di mas mihó. Mi ta orguyoso di mi logronan. Pa años mi a kompetí na e nivel mas haltu i a kompetí den hopi final importante di gimnasia.”

Riba 31 di ougùstùs próksimo e lo tuma su despedida ofisial durante un torneo di klasifikashon mundial na Heerenveen.