E polémiko Landadó merikano…. Ryan Lochte ta debutá ku viktoria despues di suspenshon

65
Ryan Lochte ta debutá ku viktoria despues di 14 luna di suspenshon.
STANFORD – Apénas algun dia despues di a kumpli ku su periodo di suspenshon, e landadó merikano Ryan Lochte ta debutá ku viktoria, despues di a keda suspendé pa faya ku e regla di dopahe.

Nèt un dia despues di a kumpli 35 aña di edat, Lochte ta konkista su promé titulo nashonal for di 2014. Lochte a logra viktoria riba 200 meter miksto  registrando un tempu di 1.57,76. Tabata su úniko kompetensia durante e gran final durante e kompetensia di natashon ku a tuma lugá na Stanford.

Ku e tempu konkistá aki e lo a keda for di e gran final riba e disiplina aki durante e kampionato mundial ku resientemente a tuma lugá na Gwangju. Lochte, kende tin plan serio pa partisipá na su di sinku weganan olímpiko na Tokyo, tabata suspendé pa 14 luna.

Esaki no tabata pa un tèst di doping ku a resultá positivo, sino mas bien pa e echo di hasi uzo di infüs i asina ingerí un produkto di vitamina den su sistema. Esaki ta loke ku e tabata hasi, segun un pòst riba medionan sosial, unda ku e tabata inyektá su mes na kas i no via un hospital ku outorisashon di e outoridatnan di doping.

Esaki tabata  su di dos kaso di suspenshon despues di su suspenshon pa mal kondukta durante weganan olímpiko di Rio. Lochte for di su promé partisipashon na weganan olímpiko di 2004 a gana no ménos ku 6 medaya di oro.