Kampion olímpiko Kolombiano…. Caterine Ibargüen ta bandoná Panamerikano debí na leshon

102
Caterine Ibargüen ta bandoná weganan Panamerikano 2019 debí na leshon.
LIMA – E strea di atletismo kolombiano, Caterine Ibargüen, ayera a pone un fin na su partisipashon den e weganan Panamerikano di Lima Peru, debí na leshon, segun su propio entrenadó, e kubano Ubaldo Duany, a konfirmá pa prensa.

Esaki mes ora ta nifika ku e kampion olímpiko lo pèrdè e posibilidat di alargá su titulo di kampion Panamerikano den e disiplina di tripel salto, ku ta programa pa tuma lugá mañan djabièrnè den oranan di atardi. E notisia aki a bira konosí despues ku e atleta kolombiano di 35 aña di edat a keda for di e premiashon di e disiplina di bulamentu leu.

“For di dos siman pasá nos a tuma e desishon aki. Caterine tin un asina yama ‘fascitis plantar’ na su pia rèks i lo ta ousente durante e kompetensia di djabièrnè. For di ayera Caterine tabata disponé di su pasashi pa bula bai Colombia bèk awe djaweps pa asina sosegá”, asina Duany a konfirmá.

E ganadó di medaya di oro na Río i plata na Londen lo pèrdè di e forma aki e posibilidat di kompetí den su modalidat predilekto den e aktual weganan Panamerikano, di kual e la sa di konkista medaya di oro na Toronto 2015 tambe. “Nos mester a tuma e desishon aki pa su bienestar. E tabata ke ta parti di e delegashon di Colombia ku ta kompitiendo den e weganan na Lima.

Nos tabatin algun siman sin prepará pa e tripel salto, mirando ku esaki tin muchu mas impakto riba e pia i lo por empeorá e leshon i nos no tabata ke pa esaki sosodé. Nos tin ku konsentrá riba e final di Diamond League i alabes e mundial di Doha, pa kual awor e tin mester di sosiegu”, asina e entrenadó kubano a remarká.