Persekushon terorista for di Alemania ta kaba den Amsterdam

85
terorista a pone bòm falsu den sentro komersial
AMSTERDAM—E hòmber ku polis a detené na Amsterdam despues di un persekushon posiblemente a pone un bòm falsu na Alemania.

El a keda detené despues di un persekushon largu for di Alemania pasobra el a pone e bòm falsu den un sentro komersial na Duisburg. Polis a detené e hòmber di 31 aña i mester presentá e siman aki dilanti hues komisario asina e por keda ekstraditá pa Alemania. Ayera mester a evakuá sentro komersial Forum na Duisburg despues di a haña un pakete sospechoso. Entretantu a kaba e trabounan. Outoridatnan ta sali for di punto di bista ku ta trata di un bòm falsu segun un bosero polisial aleman. E no kier a duna informashon di e hòmber sospechoso. Segun prensa aleman ta trata di un asina yamá Reichsbürger, persona ku ta ninga outoridat di e aktual estado aleman. Nan ta ninga demokrasia i hopi biaha ta ninga e Holocaust. E hòmber a hui ora agentenan tabata kontrolá su outo na Dinslaken, posiblemente ku un arma kandela. Agentenan aleman ku nan koleganan hulandes a persigui e sospechoso riba distansia di 180 kilometer via diferente karetera. Na Duivendrecht agentenan a blòkiá e outo. Polis mester a tira dos biaha riba su tayonan pa e no bolbe hui. Asina nan a logra detené.