Rhuggenaath i Gijsbertha tabatin diferente oportunidat pa skapa medida

882
360 Mion: Gijsbertha no ta na altura di un suma di 360 mion florin asigná pa Banko Sentral na gobièrnu di Kòrsou i St. Maarten pa un parti.
Punda—Kabinete Rhuggenaath tabatin bastante oportunidat pa evitá un medida di instrukshon riba maneho finansiero di Kòrsou. Pa motibunan deskonosí esaki a keda neglishsa indikando ku tantu minister di finansas Kenneth Gijsbertha komo Promé Minister Eugene Rhuggenaath a bai di akuerdo pa e medidanan keda introdusí.

360 mion na Banko Sentral
Riba kuentanan di Banko Sentral prosedente fo’i diferente banko off shore, tin su suma di 360 mion florin di fris. Ta trata di kuentanan konfiská pa Banko Sentral for di 2006. Mayoria si no ta tur e kuentanan ta prosedente for di klientenan di  e banko First Curacao International Bank, FCIB. E banko tabata wòrdu dirigí pa John Deuss i na 2006 a deskubrí ku bou di supervishon di Banko Sentral Deuss tabata krea fasilidat pa kompanianan oropeo laba plaka via dor di desviá e sistema di Impuesto riba Benta (omzetbelasting/”VAT Froud”) britániko. Servisio di Impuesto a akusá Banko Sentral di Kòrsou di a laba riba 10 Bion florin via desvio di Impuesto. Entre 2006 pa 2019, 13 aña largu a tuma lugá diferente proseso di investigashon resultando den konfiskashon di miónes. Banko Sentral despues di trabounan largu a logra limpi kasi tur kuenta pendiente algun ku ainda ta indikativo di tabata envolví den labamentu di plaka. A resta riba e kuentanan un suma di riba 180 mion dòler blòkia pa Banko Sentral pendiente un investigashon final di Ministerio Públiko. Na yüli último un grupo di kompania, e.o. Corbiere Trust a hasi nan último intento pa haña nan sèn, pero Banko Sentral a ninga esaki. Den korte, durante tratamentu a bin sali na kla ku na mei 2018, Ministerio Públiko a drenta Banko Sentral i konfiská dokumentonan di e kompanianan ku tin nan kuenta blòkiá na Banko Sentral. Banko Sentral a duna di konosé na Korte di no tei laga e sel los pasobra tur ya ta asigná pa bai riba kuenta di gobièrnu. E informashon a bini dirèkt for di 4 representante den Banko Sentral sintá dilanti un wes sivil. Otro luna Ministerio Públiko ta konkluí nan investigashon i wes ta pendiente di esaki. Minister di Finansas Kenneth Gijsbertha, enkargá ku maneho di Banko Sentral no tabata na altura di e informashon.

360 Mion: Gijsbertha no ta na altura di un suma di 360 mion florin asigná pa Banko Sentral na gobièrnu di Kòrsou i St. Maarten pa un parti.

56 mion na Benta CPA
Tantu Minister di Finansas Kenneth Gijsbertha, Promé Minister Eugene Rhuggenaath a konfirmá públikamente ku 34% di akshonnan den CPA ya ta kasi bendí. Mesun informashon a wòrdu konfirmá pa direktor di CPA, Humberto de Castro. Ta e intenshon kumbiní pa bende 20% na Haf di Rotterdam i 14% na APC, e fondo di penshun lokal. Kestion ta kuantu 34% di akshon den haf di Kòrsou ta bal. Ekspertonan finansiero di komptabilidat na APC n’e momentunan aki ta kalkulando e balor di 14 di nan futuro atkishon den haf. Fuentenan verídiko den seno dje kálkulonan na APC a indiká ku APC a paga 10 mion florin pa 6% di akshon ku tabata den man di Korpodeko. Korpodeko a bende APC na partisipashon den haf i ekspertonan na APC ta saliendo fo’i un punto di bista brutu ku kada % den CPA ta bal alrededor di 1.6 mion florin sin deskontá balornan di aktivo pafó dje balans finansiero di CPA. Fo’i punto di bista kalkulativo indikativo 1% ten haf ta bal brutu 1.6 mion, ta nifiká ku 34% ta bal brutu por lo ménos 56 mion florin (34×1.6). E negosiashonnan ta den proseso ainda, pero ta definitivo ku tur akumulá for di benta di CPA ta bai direkshon di e  fundashon CDI pa despues subi kuenta di un banko nobo ku tei yama Invest Curacao, kual gobièrnu ulandes a forsa Kòrsou pa firma den e dokumento Strategia di Kresementu.

Reino: Reino Ulandes no tin niun intenshon di laga Kòrsou bai. Ku 20% interes den haf i miónes na invershon riba kuentanan di Invest Curacao, Raymond Knops riba e foto tin Eugene Rhuggenaath mará na “kònòpi”. Riba e foto, Rei Willem Alexander i Maxima durante inougurashon di Mega Pir Tula den kompania di direktor di CPA de Castro, Raymond Knops i Eugene Rhuggenaath.

60 mion benta UTS
Na mart último, United Telecommunication Services a firma un akuerdo di benta ku e kompania Liberty Latin America Ltd. Un total di 350 mion a sera e dil kompleto pero solamente 140 mion a keda disponibel pa repartishon na interesnan di akshonista, den e kaso aki gobièrnu. Ya den diferente artíkulo Vigilante a splika repartishon di e fondonan prosedente di benta, pero al final 60 mion florin lo subi kuentanan di e kompania Curacao Development Institute ku na su turno lo traspasá tur riba kuentanan di Invest Curacao. Esaki ta informashon konfirmá pa tantu minister Gijsbertha komo Minister Rhuggenaath. Mester tehe kuenta ku kasi 22 mion for di e 60 mion ta di fris riba kuentanan intermediario pa finansiá eventual kleim ku presentá despues ku e benta a tuma lugá.

Kontentu: karanan kontentu despues di firma ku Liberty. Nada pa gobièrnu tapa buraku riba presupuesto di likides.

60 mion SEO (10 mion benta Kura Ulanda)
SEO, Stichting Economische Ontwikkeling, ta un fundashon ku for di 2015 ta tratando na destituí i na Febrüari 2019 esaki a tuma lugá. E fundashon ta un fundashon ku su propio entidat pero prosedente for di fondonan di gobièrnu. Momento a destitui e Fundashon a keda atras alrededor 20 mion florin na sèn i 40 mion na aktivo mediante bolsa di fiansa otorgá na e.o. Proyekto di Hotel na Santa Barbara i Kura Ulanda. E konstelashon di e fiansanan no ta muchu konosí, pero bou di aprobashon di Gijsbertha ta tratando na manda e 40 mion na aktivo i mas 20 mion pa Korpodeko. St. Maarten kende na 2017 a risibí plaka for di SEIO a depositá 8.5 mion florin dirèkt riba kuenta di nan gobièrnu pa yuda finansiá nan défisit. Na Kòrsou, ta argumentando pa manda e sèn bek konforme statutonan di SEO na institutonan pa promové mas invershon en bes di pone e sèn dirèkt riba kuenta di gobièrnu.

Bob Traa

UNDA E SEN LO BAI?
360 Mion Banko Sentral: si akaso Ministerio Públiko informá Banko Sentral na sèptèmber próksimo ku e plakanan di fris riba nan kuentanan ta prosedente di krímen, Banko Sentral tin akseso na e bolsa. Bob Traa, direktor di Banko Sentral tin e poder mayoritario pa risibí instrukshon di Ulanda i Banko Sentral Ulandes kiko finalmente tei pasa ku e sèn.

56 Mion CPA: Invest Curacao, kual instituto Raymond Knops a konsehá pa laga Ulanda set up, ya kaba a menshoná ku tur lokual gobièrnu di Kòrsou bende ta bai pa Invest Curacao. Esaki Rhuggenaath i Gijsbertha a konfirmá.

60 Mion UTS: tur lokual a generá fo’i benta di UTS ta wòrdu repartí. 60 mion ta bai pa Invest Curaçao. UTS a wòrdu bendí pa 350 mion total. Segun Gijsbertha, despues di deskontá tur kos ta sobra 140 mion florin. Di esaki 1.1 mion ta subi kuenta regular di gobièrnu

60 Mion SEO: tur sèn destiná ta bai Korpodeko