Rhuggenaath: “no ta mishi ku e Akuerdo di Kresementu”

595
No: Rhuggenaath a bisa ayera no tei mishi ku e Akuerdo di Kresementu.
Fòrti—Ayera Promé Minister di Kòrsou, Eugene Rhuggenaath a duna di konosé ku “no ta bai tin mishimentu ku e Akuerdo di Kresementu”. Anke e la atmití di a firma e akuerdo ku Knops hopi riba man, pero a pasa e punto di no wak bek. Esaki ta e mensahe ku Rhuggenaath a laga atras despues di su konsulta semanal ku medionan di komunikashon ayera den Fòrti Amsterdam.

E firmamentu a tuma lugá na final di yüni, despues ku Ulanda a pone preshon riba instrukshon. Segun Eugene a firma pa evitá ku Ulanda implementá instrukshon. En bèrdat segun e promé minister no tabatin tempu pa mas konsulta debí na e preshon. “Mi mester atmití ku en bèrdat no tabatin tempu pa konsulta, pero tabata debido kalkulashonnan riba efektonan stratégiko di e akuerdo”, e promé minister a sigui bisa ayera. Segun e la sigui splika ta trata di medidanan ya konosí pa parlamento ku a wòrdu tratá den diferente reunionnan públiko. E.o. a súplika pa Banko Sentral kalkulá efektonan riba ekonomia di Kòrsou.

E promé minister a sigui señalá ku Kòrsou por skohe pa 2 trayekto. 1. Implementashon di e Akuerdo di Kresementu òf 2. Ninga ehekushon i aseptá ku Ulanda lo imponé un Medida General di Reino. Esaki lo duna Ulanda akseso na e gobernashon kompleto di Kòrsou. “Esaki ami lo no aseptá”, Rhuggenaath a duna di konosé i pa tal motibu no tei tòrnu mas na e akuerdo el a sigui señalá. E minister a bisa ayera pa tur hende “Bini mes ku bo Idea”, pa di e forma aki inisiá stimulashon di aktividat ekonómiko na Kòrsou. E minister a bisa ku no ta awor sino Cft tin 2 aña ta kantando medida. Na 2017 e.o. a ehekutá un proseso di kumplimentu unda a forsa kobransa di impuestonan atrasá ku a resultá eksitoso segun Rhuggenaath.•