Rutte mester siña di derotanan IMF i Komishon Oropeo

157
dos derota pa Hulanda pa funshonnan tòp
DEN HAAG—Pa di dos biaha den korto tempu a pasa Hulanda pa nombramentu di un funshon internashonal.

Eks-minister Dijsselbloem na último momentu no a bira e kandidato ku Oropa lo a presentá pa presidensia di Fondo Monetario Internashonal. Oropa a propone e bulgaro Kristalina Georgieva. Hulanda a pèrdè kara segun koresponsal Sander van Hoorn di Union oropeo. Hulanda tabatin dos bon kandidato pa un funshon tòp internashonal ku na último momentu ta kai afó. E otro kandidato tabata Timmermans ku komienso di luna no a bira e president nobo di Komishon Oropeo.  Segun Van Hoorn esaki ta un derota pa tantu Hulanda komo premier Rutte pasobra e tabata personalmente envolví den e negosashonnan. Alemania ku Spaña a duna sosten na Dijsselbloem pero Fransia no. Inglatera no a vota. Pa sufisiente sosten tabatin mester di 28 ministernan di Finansa oropeo. E sosten no a bini i Dijsselbloem a gradisí. Resistensia di paisnan sur i ost di Oropa tabata determinante. Gresia ainda lo tabata resintí Dijsselbloem pa e aserkamentu duru durante e krisis. Gabinete Rutte mester siña su lès. Hulanda su aliansa ku Inglatera tampoko a yuda e kousa. Inglatera ta praktikamente for di Union Oropeo i Hulanda mester buska otro aliadonan. Segun eksperto di ING Georgieva lo ta un bon president pasobra e tabata na Banko Mundial i dos biaha komisario den Union Oropeo.