Scherpenheuvel vs Vesta den gran final

182
Vesta lo ta en buska di nan prome titulo den prome divishon FFK.
WILLEMSTAD—Djadumingu próksimo dia 11 ougùstùs 2019, ta fecha pa e gran final di e kampionato di futbòl FFK, den promé divishon pa loke ta temporada 2018/2019.

Lo bai ta e wega entre e ekiponan di Scherpenheuvel, dirigí pa Kenneth ‘Bob’ Bernabela i Vesta, ku ta bou di direkshon di Henry Caldera. Esaki ta programá pa hunga inisiando 6’or di atardi, den Stadion Ergilio Hato na Brievengat.

Lo bai ta un enkuentro, ku ya un i tur ta pendiente p’e, unda despues di mas ku 50 aña, Scherpenheuvel lo bai trata na logra un titulo, miéntras ku Vesta, tin intenshon pa optené nan promé titulo den nan historia.

Despues di a keda for di e final temporada tras di lomba, unda ku durante di e dos temporadanan promé ya nan tabata den final, Scherpenheuvel ta bèk den akshon riba e último fecha. Tantu 2, komo 3 aña pasá nan a bira supkampion, despues di pèrdè ku Centro Dominguitu den final.

Miéntras ku Vesta ta den nan segundo final, ripitiendo esaki, despues ku temporada tras di lomba nan a bira supkampion, pèrdiendo ku Jong Holland den e wega finalisimo.

Pues lo bira un lucha, unda e ekiponan ku tabata supkampion durante di e último 3 temporadanan ta den lucha pa e titulo máksimo.