Selekshon U-15 maskulino a logra 1 punto ayera

166
Selekshon futbol maskulino U-15.
WILLEMSTAD—Nos selekshon di futbòl maskulino kategoria U-15, a logra na optené un punto ayera na Tampa. Esaki den nan segundo wega di e torneo di Concacaf ku ta tumando luna na Bradenton Florida, riba tereno di IMG Academy.

Nos ekipo ta forma parti di Grupo A di e promé divishon, unda despues di kai vensí 5-0 kontra Israel djadumingu, a empatá na 1 gol ku Panamá ayera. Un ke otro despues di tabata atras na sosiegu.

Melbourne Marquez Ricardo, e atakante number 10 di nos ekipo, a logra anotá pa asina empatá i logra e punto, pa e ekipo dirigí pa Germain ‘Jerry’ Ignacius, kende ta konta ku Johan ‘Marco’ de Jong, komo asistente.

Despues di ya tin 2 partido tras di lomba, nos ekipo U-15, lo bolbe mira akshon mañan, djarason dia 7 ougùstùs 2019, ora nos topa e aktual kampionnan ku ta Mexico. Lo bira nos último wega di e buèlta inisial di grupo, unda e promé 2 ekiponan lo kontinuá pa e siguiente buèlta.

Mexico den nan promé kompromisonan a gana di Panamá 3-0 i ayera a empatá ku Israel 1-1.

Kòrsou ayera a hunga ku Keanu Zichem den gol, huntu ku Dayron Boelijn (Jaydon Rock 47’), Eduardiño Perez Felis, Rensver Juliana (kapitan), Zain Virginia (Keanu Krips 61’), Melbourne Marquez Ricardo (Gol 45’), Marcel Anthonia, Yesias Yeremias (Jaeve Elshot 47’), Gurailly Hooi (Mika Donker 48’), Rayden Winklaar i Gior Selassa (Quihaindri Bibiana hel 28’).

Aruba

E selekshon similar di Aruba, ku ta parti di e segundo divishon di e kompetensia aki, a hunga nan promé wega ayera i a sufri goliada di 4-0 na man di St. Vincent. Awe nan lo topa Bermuda, ku a a golia Antigua i Bermuda 3-0 ayera.

Boneiru

Miéntras ku Boneiru, ku ta parti di e terser divishon, a logra 1 punto ayera, den un empate sin anotashon kontra St. Martin i awe lo enfrentá e ekipo for di Virgin Island, ku ayera a golia Anguila ku skor di 5-0.

 

Standing Grupo A

EKIPO           WH     WG     WE      WP     PUNTO          GF-GK            SALDO

Israel              2          1          1          0       4                  6-1                    5

Mexico            2          1          1          0       4                  4-1                    3

Panamá          2          0          1          1      1                   1-4                   -3

Kòrsou          2          0          1          1       1                  1-6                   -5