Sigur pa e proksimo 3 añanan… Ofisialmente Fórmula Un lo sigui tuma lugá na Méhiko

104
Fórmula Un lo sigui tuma lugá na Méhiko.
MEHIKO – Claudia Sheinbaum, hefe di e gobièrnu di e ‘Ciudad de México’, ayera, pa medio di un video ku a keda publiká riba retnan sosial, a informá ku e Gran Premio di Fórmula Un lo sigui tuma lugá na Mehiko.

“Mi ke duna boso un tremendo notisia, Fórmula 1 ta keda den ‘Ciudad de México’. Mañan (awe djaweps) e dirigentenan di FIA ta yega Méhiko pa firma e akuerdo di 3 aña”, asina Sheinbaum a informá.

E parti polítiko tambe a informá ku pa sigui organisá e evento, lo no hasi uzo di e rekursonan públiko. Awe djaweps, den e antiguo Palasio di hustisia, nan lo organisá un konferensha di prensa pa di e forma aki brinda mas detaye relashoná ku e akuerdo nobo ku a ser firmá.

“Ta danki na un grupo grandi di empresario ku a uni forsa, ku a logra hasi esaki posibel, mirando ku na e okashon aki no a invertí niun rekurso públiko di e siudat”, asina Sheinbaum a finalisá.