“Ta abo mes tin e reseta pa ta kampion”

409
Kenneth 'Kenny' Kunst.
WILLEMSTAD—Diferente ta e ekiponan ku a aserká e futbolista Kenneth ‘Kenny’ Kunst, pa asina e por ta parti di nan organisashon pa e temporada benidero. Un ke otro despues ku durante di aktual kampionato, e futbolista tabata ku e ekipo trikolor di Jong Holland, pero pa ya un temporada ta inaktivo, despues ku dirigentenan a opta pa no sigui ku e futbolista.

Tabata durante di fin di siman tras di lomba, ku Deporte Vigilante a topa ku ‘Kenny’ i a hiba un kombersashon ku e futbolista. Entre otro tambe riba su futuro den futbòl lokal.

“Mi no tabata pensa pa hasi muchu kos mas i simplemente dibertí mi mes, pero yamadanan di último dianan a pone ku mi ta bai pensa tòg di nobo. Diferente dirigente ku a komuniká ku mi a splika mi ku e motibu di nan yamada ta paso ku awó si definitivamente nan por a konfirmá ku ta mi mes tin e reseta i nan kier ta kampion”, e futbolista a duna di konosé.

‘Kenny’ ta futbolista ku durante di e último añanan, semper tabata parti di e ekipo ku a logra e titulo. Esaki primeramente ku e ekiponan di Centro Dominguitu i Centro Barber i temporada tras di lomba ku e trikolornan di Jong Holland, pero pa e temporada aki, ya pa basta luna ta inaktivo.

Awor ta pendiente pa e moveshonnan, pa asina sa ki desishon, un di e mihónan den nos futbòl, durante di e último añanan, lo bai tuma.