Venezolanonan na Miami ta aploudí medidanan di Trump

123
Venezolanonan na Miami a aploudí desishon di Donald Trump.

ESTADOS UNIDOS – Organisashonnan di derechi humano i di venezolanonan na Miami a reakshoná den oranan di ayera ku satisfakshon na e medidanan nobo estadounidense kontra e gobièrnu di Nicolas Maduro i den mesun rosea a reklamá pa pone mas peso riba e personanan ku ta hasi negoshi ku Venezuela den Estádos Unidos.

Patricia Andrade, direktor di Venezuela Awarennes Foundation, a indiká na medionan di komunikashon ku e gobièrnu di Trump tin awor di dirigí su mes riba e vários shen mil siguidónan di Maduro ku ta na Estádos Unidos.

Segun Andrade, un hende simplemente ta sinti rabia di pensa ku e personanan por a hasi nan mes riku ku e problemanan ku tin na Venezuela i ku nan tin visanan di invershonista na Estádos Unidos òf ku inkluso a solisitá asilo polítiko na e pais.

Tur esaki tabata reakshonnan despues ku djaluna último, e presidente estadounidense Donald Trump a imponé un blokeo total di bienesnan estatal di e gobièrnu di Venezuela den teritorio estadounidense. Esaki komo un paso nobo den intento di kaba ku Nicolas Maduro komo mandatario.

Meskos ku Andrade, e presidente di e organisashon di Venezolanonan Persiguí Politikamente, Jose Antonio Colina, a gradesí Trump pa impedí ku Maduro por sigui tuma desishonnan relashoná ku kosnan di Venezuela na Estádos Unidos.

E gobiernu di Nicolas Maduro a kalifiká di su banda, e situashon aki komo un agreshon nobo i grave di terorismo ekonómiko. Pues segun e echo di blòkia bienesnan estatal di venezolanonan na teritorio estadounidense ta simplemente inakseptabel.