“Vesta ta mas uni ku nunka i ta desidido”

404
E ekipo di Vesta ta praktikando ku mas di 30 hungado na tereno.

 

WILLEMSTAD—Deporte Vigilante den kurso di e dia di ayera, a risibí yamada i reakshonnan di sigur 3 diferente dirigente di e ekipo di futbòl, for di bario di Sta Maria i bisindario, Vesta.

Tur enfatisando ku tur kos ta bon den e grupo i ku nan ta kla pa logra e titulo djadumingu benidero.

“Bo por skibi ku Vesta ta mas uní ku nunka i desidido”, tabata reakshon di e promé.

E otro a duna di konosé ku tur nanishi ta bèk den mesun direkshon i ku e konsentrashon, e siman aki, ta solamente riba e gran final.

Miéntras ku e último a splika lo siguiente:

“Vesta a train djaluna den stadion di S.U.B.T. E ambiente tabata tremendo i tabatin mas ku 30 hungadó, ku entre nan diferente mucha di U-20. Por a mira tambe ku nos goliadó prinsipal, tambe a train i ku hopi smak. Mester bisa asta ku e tabata un di e promé hungadónan ku tabata presente. Pues Vesta ta tuma e final aki hopi na serio i e aña aki si, nos ke hisa e kopa di kampion na laria”, un di e ;pilanan di e ekipo a splika.

Pues ku esakinan, despues di e publikashon di djaluna último, por konkluí ku tur kos ta tras di lomba i e ekipo di Sta Maria, ta preparando pa por optené nan promé titulo máksimo di promé divishon di futbòl FFK, na momentu ku djadumingu awó, pa 6’or di atardi, nan topa Scherpenheuvel den e gran final den Stadion Ergilio Hato na Brievengat.