Dama ku a  kima  durante eksploshon den ofisina di number ta bèk na Kòrsou

Te awe no a tende nada ni kousa di e eksploshon

3599
Pa su protekshon e ta usando un máskara di plèstik na su kara.
  • Willemstad—–  Sigur e kadena di orashon ku a tuma lugá e dianan despues di eksploshon a  yuda te ku e dama víktima Alexandra Duarte Vilchez di 23 aña ta bek na su pais natal despues di a keda  8 luna na Colombia pa asina por a haña tratamentu  pa e kemaduranan ku e la sufri dia 6 di novèmber 2018 den e ofisina di number di Joe Black den Columbusstraat.
Tabata dia 6 di novèmber 2018 e eksploshon a tuma lugá den e ofisina di number.

Tabata djamars 6 di novèmber 2018, alrededor di 16.36 or, Sentral di Polis a risibí informashon ku den un kantor di number den Columbusstraat tabatin un eksploshon i ku tin un persona heridá.

Na yegada di polis na e sitio nan a topa ku un dama di 22 aña di edat, ku kemaduranan serio na su kurpa. Ambulans ku a presentá na e sitio a transportá e dama den situashon di preokupashon pa poliklínika di SEHOS pa tratamentu médiko. For di investigashon realisá a bin saka afó ku un otro dama tabata trahando den e ofisina di number i a kuminsá sinti oló straño. E na su turno a bèl i pone su supervisor na altura ku e ta sinti oló straño den e ofisina i ku debí na esaki e la haña basta doló di kabes i lo bai kas.

E víktima ku a sufri kasi 90 porshento di kemaduranan na su kurpa.

A bisé pa sera e ofisina i bai kas. Mas despues e dama víktima den e kaso aki Alexandra Duarte Vilchez mester a yega na e ofisina i a habri e porta pa asina por a kuminsá bende number manera ta su trabou diario. Tabata na momento ku e la bai hinka e steker den koriente a surgi un eksploshon ku a kousa kemaduranan basta serio na kasi 90 porshentu di su kurpa. Mesora a transporte pa Poli pa despues a sali kuné pa Colombia pa asina e por a haña tratamentu médiko mas avansá. Ayera tabata e grato dia ku Vigilante a bin topa ku e dama víktima aki den Punda i mesora a hasi un entrevista kòrtiku kuné debí ku ainda e no a rekuperá totalmente.

E ofisina di number unda e eksploshon a tuma lugá.

E damita ku basta fe a splika ku ta luna pasa e mester a yega Kòrsou despues i a haña tratamentu basta pisa na Colombia. E dama splika ku e promé kos ku e la hasi ora e la sufri e kemaduranan tabata di pidi Dios Tata den Shelu pa no lag’é muri i no wòri kon e keda i ku sigur e kier sigui biba. Segun e dama a bisa ku loke a pas’é ta sigur un milager.  E la sigui splika ku ora e la wòrdu transportá pa Colombia i na su yegada e la kai den Koma i na momento ku e la rekuperá a splik’é ku tabatin e pensamentu ku sigur ni 1 porshento lo e rekuperá i keda na bida. Mester a sigui basta tratamentu pa rekuperá di loke e la pasa aden. E dama a splika úniko dos kaminda ku e no a sufri kemaduranan tabata na su barika i lomba. Ámbos pia tabata tur kima i a haña basta tratamentu na kara i tambe orea pa asina esakinan por a rekuperá.

A hasi basta investigashon na e sitio pero no a tende nada mas di e resultado.

E dama a splika ku  e no ta wòrdu kon e la keda pero ta hopi kontentu i agradesido na Dios ku e ta ku bida. E dama a yama tur su ser kerinan ku no a lag’é kai nunka i a keda enkurashe pa awe e por ta riba pia pero ainda no totalmente rekuperá. Loke ku si e kier hasi ta hasi algun tratamentu mas entre nan sirugia plástiko pa asina por drecha su kara aun mas mihó ku e ta. Na e momento aki e dama tin un máskara di plèstik na su kara pa protekshon di su kuero. Ku basta fe e dama a splika ku yudansa di Dios e lo sigui lucha pa bai dilanti pa asina por rekuperá kompletamente i e sigur lo no tin e bèrgwensa pa enfrentá mundu. Vigilante ta deseá Alexandra hopi forsa i ku pronto e por haña e chèns pa realisá e siruhianan plástiko manera e ta deseá. Pa mas detaye wak nos video di su entrevista riba nos Facebook.